Berri-Otxoak Gizarte Bazterketaren aurkako eta Gizarte Eskubideen aldeko plataformak salatu du EAJko udalbatzak ez duela aterpetxeren aldeko mozioa osteguneko udalbatzan sartu, eta ez dutela mozioa eztabaidatzerik izan. Hori salatzeko, eskubide sozialen eta herritarren parte-hartzearen aldeko kontzentrazioa egin dute ostegunean udaletxe aurrean.

Berri-Otxoak eta Barakaldoko zazpi bizilagun elkartek mozio bat aurkeztu zuten astelehenean. Mozio horren bidez elkarteek eskatu diote udalari aterpetxe bat abian jar dezala etxegabeentzat, eta hori martxan jarri ez bitartean, ez dezala itxi pertsona etxegabeek erabiltzen duten kiroldegia. Martxoaren 31an ixtea aurreikusten du udalak.

Antolatzaileek eskatu diote udalari Zerbitzu Sozialen Legea betetzeko: lege horren arabera, 20.000 biztanle baino gehiagoko herriek zentro sozial bat eskaini behar dute etxerik ez duten pertsonentzat.