Berangoko beste hamabost pertsona deitu dituzte deklaratzera Auzitegi Nazionalera, ongietorri baten harira

  • Azaroaren 17an eta 18an Espainiako Auzitegi Nazionalean deklaratu beharko dute, Ibai Aginaga preso ohiaren ongietorriaren harira. Abuztuan beste hiru lagunek deklaratu zuten, “terrorismoa goraipatzea” egotzita. Berangoko inputatuek salatu dute militantzia eta antolakunde politikoen aurkako jazarpena “agerikoa” dela Ertzaintzaren, Espainiako Poliziaren eta Guardia Zibilaren txostenetan.

Martxoan geratu zen aske Ibai Aginaga berangoztarra, ia hogei urteren ostean. / Argazkia: Gedar.

2022ko azaroaren 15an - 08:00

2022ko martxoaren 13an Berangon (Bizkaia) Ibai Aginaga euskal preso ohiari eginiko ongietorriaren harira hamabost lagun deklaratzera deitu dituzte azaroaren 17an eta 18an, Espainiako Auzitegi Nazionalean. Inputatuek ohar batean salatu dute “norbanakoen aurkako eraso judiziala” izateaz gain, antolakunde politikoen aurkako jazarpena eta kontrola “agerian” geratu direla Ertzaintzak, Espainiako Poliziak eta Guardia Zibilak aurkeztutako txostenetan.

“Askatasun politikoaren defentsa” egiteko beharra azpimarratu dute, erantzun kolektiboaren bidez: “Errepresioak ez du helburu indibiduala, kolektiboa baizik, eta nahitaez honi eman beharreko erantzuna ere kolektiboa izan beharko da”. Dei egin diote “euskal langile klaseari” antolatuko dituzten salaketa ekimenetan parte hartzera.

“Terrorismoa goratzea” egotzita

Ibai Aginaga euskal presoak ia hogei urte igaro zituen espetxean, eta martxoan atera zen Basauriko kartzelatik. Berangoko frontoian, Aginagaren herrian, antolatu zioten ongietorriak soka luzea ekarri du. Abuztuaren 22an, esaterako, beste hiru lagunek deklaratu behar izan zuten Auzitegi Nazionalean, “terrorismoa goraipatzea” egotzita inputatu zituztelako. Auzipetuek azaldu zuten ekitaldia pribatua izan zela, eta ez zela deliturik egon.

Vox-ek, Villacisneros fundazioak eta Dignidad y Justicia taldeak eskatuta ireki zuen ikerketa Espainiako Auzitegi Nazionalak. Gainera, Berangoko Udalak (EAJ) isunak ezarri zizkien antolatzaileei: hiru hilabeteko bina debeku udal instalazioak erabiltzeko eta 500 euroko bina isun, frontoiko paretetan pankartak itsasteagatik eta frontoiaren “erabilera desegokiagatik”.

Sortuk eta Euskal Preso Politikoen Kolektiboak (EPPK) ez zuten bat egin ongietorriarekin, zenbait hilabete lehenago jakinarazi baitzuten ekitaldi horiek publikoki egiteari utziko ziotela. Aginagak urte batzuk lehenago utzi zion EPPK-ko kide izateari.


Kanal honetatik interesatuko zaizu: Auzitegi Nazionala
2024-03-25 | ARGIA
Espainiako Auzitegi Nazionalak Telegram aplikazioaren blokeoa eten du, Poliziak ondorioak ikertu bitartean

Epaile Santiago Pedrazek iragan ostiralean eskatu zuen estatuan Telegram aplikazioa blokeatzea. Astelehenean blokeo hau etetea erabaki du epaile berak, lehenik neurri hori aplikatzeak ekarriko lituzkeen ondorioak aztertzeko.


2024-02-08 | ARGIA
Aske utzi dute Iturmendin atxilotutako emakumea

Espainiako Poliziak joan den asteartean atxilotu zuen Iturmendin (Nafarroa) eta, Espainiako Auzitegi Nazionalaren aginduz, Madrilera eraman zuten inkomunikatua.


Zangozako 2003ko atentatuaren auzia artxibatu du Auzitegi Nazionalak

2003ko maiatzean Zangozan Espainiako bi poliziaren hilketa ikertzen zuen auzia ixtea erabaki du Espainiako Auzitegi Nazionaleko Francisco de Jorge epaileak, ikerketa agortutzat eman ondoren.


Eguneraketa berriak daude