Gaur 19:30ean Bilboko Arriagan estreinatuko dute At! ikuskizuna. Etxepare Institutua aurkezteko egin den antzezlana da At!; horrela Etxepare Institutuak dauzkan proiektuak eta helburuak azaldu nahi dizkiote jendeari. Mireia Gabilondo eta Fernando Bernues Tanttaka antzerki taldeko zuzendariek gidatu dute ikuskizuna. Taula gainean 26 aktore, zazpi musikari, sei dantzari eta bi idazle izango dira. Dena den, taularatuko direnek bakarrik ez dute hartu parte ikuskizunean; besteak beste, han irakurriko dituzten testuak euskarazko eta gaztelaniazko 25 idazlek eginak baitira. Bideoan grabatuko dute ikuskizuna, eta testu guztiak liburu batean bilduko dituzte. Euskal sortzaileak bildumari hasiera emango diote horrela.