Argi utzi dute euren batzarretan ez dutela borroka armatua berriro erabiltzeko inolako proposamenik edota planteamendurik egin. "Ezta behin ere. Hor zehar planteatzen ari diren alternatiba gezurra da, ezker abertzaleak badu nahikoa masa kritiko beste parametro batzuen arabera antolatzeko", adierazi du Fernando Lizeagak, Patxi Eskisabel eta Joel Sistiagarekin batera emandako prentsaurrekoan.

Alderdi politiko berria sor dezaketen galdetuta, Lizeagak esan du denen artean erabakiko dutela nola antolatuko diren eta euren borroka aurrera nola eta zein bitarteko erabilita eramango duten. Dena den, gehitu du oraingoz ez dutela alderdi politiko bat sortzeko asmorik.

Hiru helburu ezarri dituzte, Bilbon aurkeztutako agirian diotenez: "Borrokaren duintasuna mantentzea eta Euskal Herri Langilearen historia berridazteko zein manipulatzeko saiakera guztiei aurre egitea; belaunaldi berriei etorkizun libre eta hobea eraikitzeko ateak ez ixtea; eta errepresaliatu politikoei haien babesa ematea eta etsaiaren xantaien aurrean amore ez emateagatik bat bera ere bide bazterrean botata geldituko ez dela jakinaraztea".

Arraizen ustez, ibilbide laburra

Hasier Arraiz Sortuko presidenteak adierazi du bere ustez Askatasunaren Bidean ekimenak "ibilbide laburra" izango duela. Halaber, Sorturi egin dizkioten kritikek ez diotela minik eragin esan du Ser irratiari emandako elkarrizketan.