Araba, Bizkaia eta Gipuzkoako kazetarien bi erakunde nagusiei babesa eskatu diete ARGIAk eta Hala Bedik, Gasteizen azken egunotan bi kazetarik poliziaren aldetik izan dituzten mehatxuak direla-eta.  

Lehenaren kasuan, Udaltzaingoa saiatu zen etxe-kanporatze bati loturiko polizia operazioaren lekukotasun grafikorik hartu ez zezan kazetariak; bigarrenari, berriz, Ertzaintzak telefono mugikorra kendu zion Talka gune okupatu feministaren hutsaraztearen aurkako mobilizazioak grabatzen ari zenean. “Neurri legalak” hartzearekin mehatxatu zituzten poliziek bi kazetariak.

KEEk eta EKEk azaldu dutenez, jadanik eskutan dute bi hedabideek helarazitako ikus-entzunezko materiala.  Hala, mehatxu horiek “gogor” salatu dituzte eta “informatzeko eskubidearen aurkako ekintzak” direla adierazi dute.

Elkarteok gogorarazi dute Espainiako Estatuan alarma egoeran egonagatik ere, kazetariek “askatasunez” lan egin dezaketela eta “mugarik gabe mugitu” daitezkeela. Nabarmendu dute horrek bermatzen duela herritarren “informatua egoteko” eskubidea.

Komunikabideen “aurretiazko zentsura” helburu duen agintari zein segurtasun indarren ekintza oro gaitzetsi dute era berean.  Eta erakundeei eskatu diete kazetarien “funtzio publikoa” bermatzeko, gizartea informaturik egon dadin, “egiazko, kontrastatutako eta iturri oneko datuekin”.