Ser irratian elkarrizketa egin diote Barakaldoko arrain-saltzaileari. Unai Rementeria Bizkaiko ahaldun nagusiak txiokatutakoa gezurtatuz, badu kexarik eta eskakizunik, eta zuzenean esplikatu zizkion Rementeriari honek txioa idatzi aurretik.
Asteartean sare sozialak sutu zituen Unai Rementeria Bizkaiko ahaldun nagusiak, Barakaldoko Andoni Arrain-saltzaileari buruzko txioarekin. Bi enplegu eta ia 18 orduko lanaldia izateagatik kexurik agertzen ez duen eta laguntzarik eskatzen ez duen Ezkerraldeko langilea eredu bezala agertu du hurrengo foru hauteskundeetan Bizkaiko EAJren zerrendaburua denak.
Herritar askok amorruz hartu dituzte Rementeriaren hitzak, esklabo neoliberal alaiaren apologia egitea leporatuta. Arrain-saltzailearen hitzak entzunda jakin da, gainera, EAJko hautagaiaren txioak informazio faltsua zabaldu duela.
Ser irratiak Barakaldoko arrain-saltzaileari egin dion elkarrizketa laburrean, kexu da Andoni. Gero eta saltoki handi gehiago ari direlako zabaltzen, “komertzio txikiak hondoratzen" dituztenak eta, aldiz, tokiko saltoki txikiek ez dutelako laguntzarik, “ez Aldundienak, ez Udaletxeenak, ez alkateenak”. Horren ondorioz merkatu txikiak ixten ari direla dio, Barakaldokoa barne. Bertan du arrandegia. Postua mantentzeagatik soilik hilean 600 euro ordaintzen dituela dio, “gehi ura, argia...”. Laguntza eskatzen die politikariei: ez ditzatela zentro komertzial gehiago zabaldu, eta komertzio txikia lagun dezatela. “Hilabeteroko kuotengatik hainbeste ez ordaintzea eta zaborrekin lagundu gaitzatela”.
Kexu eta eskaera guzti horiek Rementeriari azaldu zizkion Andonik, elkarrizketan azaldu duenez. Ahaldun nagusiak Barakaldoko merkatura egin zuen bisita hauteskunde-kanpainaren barnean. “Hona hurbildu zen, ‘zer moduz?’ galdetu zidan, ni nintzela merkatuko gazteena, eta ea nola ikusten dudan. Eta zuri esan dizudana esan nion –diotso kazetariari–. Ez zaigula heltzen. Nik bi enplegutan aritu behar dudala batekin ez zaidalako iristen. Ez gozatzeko, baizik eta bizitzeko. Esan zidan alkatearekin hitz egingo zuela, baina gaur gaurkoz ezer ez”.
Rementeriak, hortaz, bazuen Andoniren kexen berri, kexatzen ez zela zioen txioa argitaratu zuenean.
LABek jakinarazi duenez, martxoaren 14an materiala garraiatzen ari zela zama gainera erori ondoren larri zauritutako langilea zendu da asteartean. Jadanik hamazortzi lagun dira urtea hasi zenetik lanean hildakoak, sindikatuaren arabera, eta lan istripuen "gorakada... [+]
Marka historikoak hautsi dituzte bi enpresek 2023an: Mercadonak lehen aldiz lortu du 1.000 milioi euroko irabaziak gainditzea.
Sindikatu deitzaileen arabera, ikasturte honetan Araba, Bizkaia eta Gipuzkoako sektore publikoan antolaturiko greben artean jendetsuena izan da asteartekoa, eta batez ere garraio publikoan, hezkuntzan eta udal esparruan izan du eragin handiena. Manifestazioetan 30.000 lagunek... [+]
Astelehen arratsean gertatu da ezbeharra, Arrasaten, hiru metroko sakonerara erorita.