Maiatzaren 23ko gaualdian bi ekarpen nagusi izango dira: batetik, Mattin Baxo Nafarroa Behereko euskara teknikariak azken urteetan hezkuntzan, haurtzaindegietan eta herriko etxeetan egin den lana azalduko du, eta bestetik, Ione Josie Euskararen Gizarte Erakundeen Kontseiluko kideak Ipar Euskal Herriko 19 herriko etxetan egindako ebaluazioen emaitzak kontatuko ditu.

Donapaleuko jardunaldira bereziki auzapezak eta herriko etxeetako arduradunak gonbidatu ditu Zabalik elkarteak. Hala ere, edonork har dezake parte eta antolatzaileek jakinarazi dute eztabaida librea izango dela, eta bakoitzak bizi duenerako eta kontatzeko daukanerako elkargunea izango dela. Haien hitzak erabiliz, “han hemenka diren borondatedunak, bil gaiten, mintza gaiten, ikus dezagun elkarrekin batzu-besteek zer egiten dugun, nola osa ditzakegun gure indarrak”.

Maitzaren 29an, azken hiru urteetan bezala, mendi ibilaldi luzea eta laburra antolatu dituzte. Euskaraz mintzatzeko parada izango dute ibiltariek, baita Amikuze inguruko txokoak ezagutzeko aukera ere. Besteak beste, inguruko kantuen bilduma jasoko dute ibiltariek, ibilaldi amaieran kantatu nahi izanez gero.