ARGIA.eus

2022ko abenduaren 08a

Algortako mugimendu feministako bi kide deklaratzera deituta daude ostegunean

  • Algortako Portu Zaharreko jaietan emakume bat mugimendu feministako kideengana hurbildu zen laguntza eske, ziztatu egin zutela adieraziz. Erasoen aurrean esku-hartzeko protokoloa aktibatu zuten, eta ondorioz, larrialdi zerbitzuekin eta Ertzaintzarekin jarri ziren harremanetan. Mugimendu feministak salatu du Ertzaintzak eragotzi egin ziela emakumearen ondoan egotea. Ertzaintzak, aldiz, emakume artatu zuten mugimendu feministako bi kideei leporatzen die beren lana oztopatu izana. Desobedientzia delitu larria leporatuz, Poliziak salaketa jarri du bi emakumeen kontra. Azaroaren 3an daude deklaratzera deituak. Mugimendu feministak mobilizazioak deitu ditu egun horretan.

Argazkia: Algortako Mugimendu Feministak abuztuaren 17an egindako agerraldia
Garazi Basterretxea @kilimarkilimar
2022ko azaroaren 02a - 13:05Azken eguneraketa:14:09

Azaroaren 3an, Algortako Mugimendu Feministako bi kidek Getxoko Epaitegian deklaratu beharko dute. Izan ere, Ertzaintzak salaketa jarri du beren aurka Algortako Portu Zaharreko jaietako gertakariengatik: abuztuaren 15eko goizaldean 16 urteko emakume batek ustez ziztada jaso zuen, eta Ertzaintzak kaltetua anbulantziara eramateko oztopoak jarri izana leporatzen die salatu dituen bi emakumeei. Desobedientzia delitu larria leporatzen diete.

Asteazkenerako bi mobilizazio deitu ditu Algortako Mugimendu Feministak. Goizeko 09:00etan elkarretaratzea egingo dute epaitegien aurrean, deklaratzera deitutako kideei elkartasuna adierazteko. Arratsaldeko 19:00ean, aldiz, manifestazioa egingo dute Telletxetik abiatuta.

Gertakizunen kontakizun ezberdinak

Akusazioen aurrean harridura agertu izan dute mugimendu feministako kideek; haien arabera, beraiek izan zirelako emakumea artatzen lehenak, eta erasoen aurkako protokoloa aktibatu zutenak. Gertaerak jaso eta egun gutxira, abuztuaren 17an egindako agerraldi jendetsuan, Algortako Mugimendu Feministak azpimarratu zuen protokoloa jarraitu baino ez zutela egin.

Algortako Mugimendu Feministak uko egin du jaietan ziztada bat jaso zuen adingabea artatzea eragotzi egin izana (argazkia: Hiruka)

Mugimendu feministak emandako azalpenen arabera, ziztada jaso zuen emakumea laguntza eske hurbildu zitzaien, ingurune seguru eta lasai batera eraman zuten. 112ra deitu zuten ostean, anbulantzia bat bertara zedin eskatzeko. 112tik deia Ertzaintzara bideratu zuten, eta mugimendu feministako kideak zegokion polizia-agenteari egoera azaldu eta gero, hurrengo pausuak koordinatu zituzten. Hasteko, anbulantzia erasoa jasan zuen emakumea zegoen tokira ezin zenez iritsi, adostu zuten mugimendu feministako kide batek lagunduko zuela anbulantziaraino, Ertzaintzarekin batera. Paraleloki, Portu Zaharreko Jai Batzordeari ere gertatutakoaren berri eman zioten eta erasoa jasan zuen neska adin txikikoa zela jakin bezain pronto, haren gurasoei deitu zieten; gertatutakoa azaldu eta hurrengo pausuen berri emango ziela ziurtatu zitzaion amari. Pausu guztiak neskarekin batera eman zituzten, bere oniritziarekin.

Anbulantziarantz abiatzear zirela okertu zen egoera. Une horretan bost bat gizon agertu ziren, ustez kalez jantzitako poliziak –nahiz eta udaltzain batek soilik identifikatu zuen bere burua–, Jai Batzordeko kide batekin. Beraiek eroan zuten neskatoa anbulantziara, berau artatu eta harekin konfiantza landu zuten kideak atzean utziz. “Inork, inongo momentutan, ez zuen oztoporik jarri, une hartan Poliziaren jokabidea erabat desegokia zela iritzi arren”, azaldu zuen mugimendu feministak.

Neskatoa artatutako bi kideek hitzemana zioten bere ondoan egongo zirela, baita haren amari ere. Hala bada, Poliziak kaltetuarekin batera joatea eragotzi ostean, erabaki zuten anbulantziara joatea. Horretan zirela identifikatu zituzten bi ertzainek, eta beren aurkako salaketa jarriko zutela jakinarazi zieten.

Abuztuaren 16an, ondoko deklarazioak egin zituen Ertzaintzak ohar publiko baten bidez:  “Agenteek behin eta berriz esan zieten anbulantzia bat zain zuela biktimak, ospitalera eraman zezan, baina bi arduradunek polizia-lana oztopatzen jarraitu zuten eta eragotzi egin zuten Ertzaintzak emakume gazteari anbulantzia zegoen lekura laguntzea”.

Mugimendu Feministak hasieratik adierazi zuen ez zuela onartuko “fokua desbideratu eta indarkeria matxista den gaitz soziala hutsaldu eta bigarren plano batean uzterik”, irmotasunez erantzungo diotela “mugimendu feminista kriminalizatzeko eta jo puntuan jartzeko estrategia politiko orori”. Jakinarazi zuten jarraituko dutela "sistema kapitalista sostengatu eta iraunarazi" nahi dutenentzat deserosoak izaten eta “eraso matxistarik gabeko Euskal Herri feminista eraikitzen”.

Kanal hauetan artxibatua: Errepresioa  |  Feminismoa  |  Ertzaintza  |  Getxo  |  Autodefentsa feminista

Errepresioa kanaletik interesatuko zaizu...
2022-12-05 | ARGIA
Poliziaren jazarpena eta kolaborazio eskariak salatu ditu Mugimendu Sozialistak

Mugimendu Sozialistako bi kidek Poliziaren partetik jazarpen jarraitua pairatu dutela salatu dute. Irekita zeuzkaten prozesu judizialek etorkizunean eragin liezazkieketen balizko kalteen aurrean laguntza eskaini diete militanteei, trukean Mugimendu Sozialistari buruzko... [+]


2022-11-24 | Hala Bedi
Gasteizko lau grebalarien aurkako epaiketa muntai poliziala dela salatu dute eta absoluzioa eskatu

Lau pertsona epaitu dituzte asteazkenean Gasteizen, 2020ko urtarrileko greba orokorraren harira. Babesa adieraztera gerturatu dira epaitegira dozenaka lagun, greba antolatu zuten eragileek, Euskal Herriko Eskubide Sozialen Karta osatzen dutenek, deituta.


2022-11-21 | ARGIA
Berangoko auzipetuen sumarioan zenbait militantziaren aurkako jazarpena antzeman daitekeela salatu dute

Azaroaren 17an eta 18an deklaratu behar izan dute 15 pertsonak, Iban Aginaga euskal preso ohiaren ongietorrian parte hartzeagatik terrorismoa goratzea leporatuta. Larunbatean agerraldia egin dute Berangoko frontoian, auzipetutakoei babesa helarazteko eta gertakizunen... [+]


Tubacex-eko greba
Aintzane Mendiaren absoluzioa: Epaileak agerian utzi ditu ertzainen gezurrak puntuz puntu

Beatriz Eva Roman epailearen sententziak ez du zalantzarik uzten. Modu neutroan azaltzen badu ere, Gasteizko Zigor-Epaitegiko kideak argi eta garbi jaso du Aintzane Mendia kolpatu eta atxilotu zuen ertzainaren bertsioak ez duela inondik inora errealitatearekin bat egiten eta... [+]


2022-11-11 | Leire Artola Arin
Olga Rodríguez, Ekialde Ertainean aditua
"Matxismoa Egiptoko estatuaren muina da, eta armadak beti aplikatu du"

Egiptoko matxinadetan emakumeei egin zizkieten sexu erasoak ditu abiapuntu As I Want (Neuk nahi bezala) 2021eko dokumentalak. Samaher Alqadi zuzendariak lehen pertsonatik eta gordin erakusten ditu 2011 eta 2013 artean bizitakoak, besteak beste, Kairon piztu ziren emakumeen... [+]



Irakurrienak
Argia buletina
Egunaren laburpena
zure e-postan
Eguneraketa berriak daude