Euskal Herrian Euskaraz elkarteak aurreratu zuen Twitter bidez eta gaur testuingurua Naizek azaldu titular oso adierazgarri honen pean: "Belarri prestik gabe ere, euskaraz". Gasteizko auzitegian herritar batek, lekuko gisa deklaratzera deiturik, bere lekukotasuna euskaraz emateko hautua egin zuen. Orduan gertatu zen EHHk txio batean zabaldutako elkarrizketa gogoangarria:

Herritar euskaldun ahaldundu horrek juje espainol hiztunari emandako erantzun xume bezain irmoak laburbiltzen du administrazio ustez elebidunak aitortu nahi ez lukeen egia: botere posiziotik elebakartasun espainolari egoskor eusten dioten funtzionarioek daukate konpondu beharreko arazoa, eta gastuak ere –itzultzaileenak barne– berei dagozkie.