ARGIA.eus

2020ko maiatzaren 31

Aguraingo araztegiaren egoera kaskarra, langileen baldintzak kaskartuz konpondu?

  • Azken isurketen ondorioz sorturiko eztabaidan iritzia eman dute langileek. Salatu dute guardiak eginarazi dizkietela baldintzak negoziatu gabe eta zerbitzu horrekin ezin dela “makinen funtzionamendu txarra estali”.

Urko Apaolaza Avila @urkoapaolaza
2017ko abuztuaren 31
Araztegiko ura zuri, udako isurketa batean (argazkia: Kike Fdz de Pinedo Twitter bidez)

Zadorra ibaian Dulantzi eta Aguraingo araztegiek maiz egiten dituzten isurketa kutsakorren eskandaluak erantzukizuna erakunde eta enpresa batetik bestera igaroarazi du. Arabako Foru Aldundia, URA sozietatea eta enpresa esleipendunak dira tartean.

Araztegia mantentzeaz arduratzen den enpresako langileek ohar bidez salatu dute eztabaida horretan eurak ere kalteturik irten direla, “zuzenean ari gara pairatzen problematika hau”.

Isurketak aspaldikoak dira, bain auzia pasa den maiatzean azaleratu zen, auzotar batzuek isuri kutsakorraren berri eman zutenean. Konponbide gisa, enpresa eta erakundeek adostu zuten guardia edo erreten zerbitzuak ezartzea 24 orduz, astelehenetik igandera.

Langileek azaldu dutenez egunean 8,66 euro baino ez diete ordaintzen horren truke: “Erretenak egiteko agindua egun batetik bestera komunikatu ziguten, ordutegiak eta baldintza ekonomikoak negoziatu gabe”, diote.

Euren ustez, gainera, erretenak ez dira irtenbidea araztegiek ez dituztelako alarma sistemak instalatuta eta segurtasun neurriak oso prekarioak baitira: “Erreten zerbitzu bat ezohiko arazoetan aritzeko izan behar litzateke, eta ez araztegiko makinen funtzionamendu txarra estaltzeko”. Egoera horrekin euren lan baldintzak are gehiago kaskartu direla salatu dute.

“Arabar eta ekologistak garenez eta gure ibai eta urtegiak egoera onean egotea nahi dugunez”, araztegian inbertsioak egin eta aldaketak egitea eskatu dute langileek.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Kutsadura  |  Azpiegitura handiak  |  Langile borroka  |  Agurain  |  Ibaiak

Kutsadura kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude