ARGIA.eus

2022ko uztailaren 02a

56. Durangoko Azokak berriz irekiko die atea bisitariei

  • Pandemiagatik iazko Durangoko Azokak ez zituen bisitariak hartu, baina aurtengo edizioan berriz aurrez aurrekora bueltatzearen aldeko apustua egin dute antolatzaileek. Aforo mugatuarekin eta osasun neurriak beteaz, jendeari azokara sarbidea ahalbidetuko zaio. Azoka digitalari ere eutsiko diote.

Argazkia: Durangoko Azoka
ARGIA @argia
2021eko irailaren 06a

56. edizioa du aurten Durangoko Azokak, eta abenduaren 3tik 8ra bitartean egingo da. Gerediaga Elkarteak jakinarazi duenez, osasun egoera medio iazko edizioa bisitaririk gabe egin ostean, ostera ere aurrez aurrekoa berrartzearen alde egin dute apustu. Azokak iazko azoka digitalaren ereduari eutsiko dion arren, bisitari kopuru mugatu bati ere irekiko dizkio ateak,"momentuko osasun neurrietara egokituz eta segurtasuna bermatuz". Artista, argitaletxe, diskoetxe, ekoiztetxe, banatzaile, elkarte eta bestek postu fisikoa jarriko dute Landako Gunean, eta era berean, horietan salgai egongo den produktu oro eskuratu ahal izango da sarean ere.

Aurtengo edizioari buruzko zehaztasunak ematearekin batera ireki dute bertan egon nahi duten saltzaileentzat izen-emate epea, irailaren 19a arte irekita egongo dena. Interesa dutenek durangokoazoka.eus helbidean bete dezakete izen-emate eskaera. Elkarteak web-orrian gogorarazi duenez, Durangaldeko sortzaileek “Durangaldeko argitalpenak” stand amankomunean jarri ahalko dituzte beren produktuak salgai, inolako kosturik gabe, baldin eta bi baldintza hauetakoren bat betetzen badute: produktuak Durangaldeko gaiei buruzkoak izatea, edo sorkuntza lanak euskarazkoak edo elebidunak izatea (hizkuntzetako bat euskara izanda).

Gerediaga Elkarteak Durangoko Udalarekin batera martxan jarritako IV. Sormen Beka DA ere irekita dagoela gogorarazi nahi izan dute. Aurtengo beka deialdiak praktika edota espresio artistiko baten oinarritutako lan digitala sarituko du, eta irabazlea 56. Durangoko Azokan ezagutaraziko da.

Kanal hauetan artxibatua: Durangoko Azoka  |  Durango

Durangoko Azoka kanaletik interesatuko zaizu...
2021-12-09 | ARGIA
25.000 bisitari izan dira Durangoko Azokan, 2019an izan ziren 120.000tik urrun

Gerediaga elkarteak balorazio positiboa egin du, datuak COVID-19aren aurreko edizioetatik urrun geratu badira ere.


2021-12-07 | ARGIA
"Barraka" bideo-jokoak irabazi du Durangoko Azokaren sormen beka

“Barraka” abentura bideo-joko umoretsua garatzeko urtebete izango du Ibai Aizpurua diseinatzaile eta programatzaile irundarrak. Horretarako 15.000 euroko laguntza irabazi du Durangoko Azokaren laugarren sormen bekan.


Irakurrienak
Azken albisteak
Argia buletina
Egunaren laburpena
zure e-postan
Eguneraketa berriak daude