ARGIA.eus

2021eko ekainaren 20a

3 kilometroz azpiko ibilbideak oinez edo bizikletaz egiteko kanpaina abiatu du Bizi! mugimenduak

  • Ingurumenaren egunean, ekainaren 5ean, aurkeztu du kanpaina: “Hirian, bizi eta mugi! 3 km bestela egiteko, engaia zaitez!”. Baionan, Biarritzen eta Angelun egiten diren ibilbideen %44 hiru kilometro baino gutxiagokoak dira. Hiri lasaiagoak aldarrikatu eta oinez, bizikletaz eta garraio publikoz ibiltzea sustatuko dute.

ARGIA @argia
2021eko ekainaren 07a
Kanpainaren aurkezpena egiten ekainaren 5ean. Argazkia: Bizi!.

Bizi! mugimenduak trantsizio ekologikoa bultzatzen duen Ademe erakundearen datu bat eman du: Baiona-Angelu-Biarritz hirigunean hiru kilometro baino gutxiago dituzten joan-etorrien %40 bakarkako motordun ibilgailuz egiten dira. Kanpainaren helburua da autoa ahal den neurrian bazterrean uztea, “hiri sano eta goxo bat” izateko bidean.

Ademe erakundeak emandako datuak jaso ditu Bizi! mugimenduak. Datuon arabera, kilometro bat baino gutxiagoko ibilbideetan azkarrago gabiltza oinez motordun garraioan baino. Kilometro bat eta bost kilometro arteko ibilbideetan bizikleta dabil bizien, izan ere autoek pilaketak sufritzen dituzte eta aparkalekua aurkitzeko denbora ere behar da. Baiona-Angelu-Biarritz hirigunean ibilbideen %44k hiru kilometro baino gutxiago dute, eta beraz, autoz baino bizikletaz ibiltzea gomendatu du mugimenduak. Bost eta hamar kilometro arteko ibilbideak egiteko bizikletak autoak baino minutu batzuk gehixeago behar dituela kalkulatua dute.

Hirigunean denboraren mapa osatzen ari dira, hau da, interes guneen, bulegoen, ikastetxeen, tokiko saltokien, egoitzen eta auzoen artean dauden ibilbideak oinez eta bizikletaz egiteko zenbat denbora behar den jasotzen ari dira. Mapak balioko du konturatzeko autoz baino errazago egin daitezkeela joan-etorriak oinez eta bizikletaz.

Mugimenduak adierazi du jendeak motordun ibilgailuen ordez bestelakoak erabiltzeko gogoa adierazten badu, tokiko politiketan presio handiagoa egin ahal izango dela autoa baztertu eta bestelako garraiobideak antolatzeari ekin diezaioten.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Ingurumena  |  Garraioa  |  Baiona  |  Biarritz  |  Angelu  |  Bizi!

Ingurumena kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude