Osasun krisiaren ondorioz ezarritako neurriak direla eta, gehienez ere 30.000 pertsonak izan dute Landakon sartzeko aukera, eta 25.000 baino gehiagok egin dute. 2020an ez zen Azoka ospatu, eta 2019an 120.000 bisitari izan ziren. “Pozik gaude berriro ere batzeko aukera izan dugulako”, adierazi du Azokaren antolatzaile den Gerediaga elkarteak. Eskerrak eman dizkie herritarrei, sortzaileei, argitaletxe eta boluntarioei.

Datutan

Aurten bi bide egon dira azokako produktuak erosteko, aurrez-aurrekoa eta online salmenta. Euskaltzaleek erosketa gehien aurrez-aurre egin dituztela azaldu du Gerediagak, baina onartu du argitaletxetako arduradunek adierazi diotela salmentak baxuak izan direla COVID-19 aurreko urteekin alderatuta. Online dendan 1.300 erosketa egin dituzte, 5.400 produktu saldu dira guztira, eta erosketen bataz bestekoa 58 eurokoa izan da.

Guneei dagokienez, Ahotseneko aurkezpen eta emanaldietara 7.500 herritar gerturatu da; Irudienera 1.000tik gora; Szenatokira 620 ikusle; eta Talaiara 500etik gora. Streaming bidezko zuzeneko emanaldietara 21.000 lagun konektatu da.