ARGIA.eus

2022ko irailaren 29a
Aldaketak ARGIAren bidalketan

200.000 plastiko poltsa gutxiago urtean

  • Aspaldi ari zen lantaldea gaiarekin bueltaka, eta Antza inprimategiko lankideei esker, komunitateko kideek plastikorik gabe jasoko dute aldizkaria aurrerantzean. Erabaki honekin milaka plastiko poltsa gutxiago sortuko ditu ARGIAk astero. Emaitza ikustean erredakzioan entzun zen oihua errepikatuz: gora patata!

Argia poltsa konpostagarrietan bidaliko dugu aurrerantzean. (Dani Blanco)
2019ko urriaren 03a

Hondakinak gutxitu behar genituela argi genuen, plastikoa kendu behar genuela gure produktu guztietatik, min ematen baitzigun. Ikusten genuen aukerak bazeudela aldatzeko", hala hasi da Bego Zuza ARGIAko lehendakaria, astekaria komunitateko kideei bidaltzeko erabiltzen zen plastikoa kentzearen zergatiaz galdetuta. "Uda aurretik, gure enpresa taldeko Antza inprimategiko lankideekin hitz egin genuen ea material konpostagarririk lor zezaketen, ea aurkitzen zuten modua egun dituzten makinekin bateragarria izango zen zerbait egiteko. Denok ikusi genuen oso interesgarria zela hori lortzea, ez guretzat bakarrik, baita beraiek inprimatzen dituzten beste aldizkarientzat ere". Esan eta egin, patataren fekularekin egindako zorroetan joan dira jada milaka ale lehen aldiz, harpidedunek ondoren berrerabili edo edukiontzi marroian utz ditzaten.

Katean ari dira lanean Antzako langileak. Jordi Cuixart preso politikoa azalean daraman aldizkaria dagoeneko inprimatu eta grapatu ostean, batek aldizkariak zinta mugikorrean jartzen ditu banaka, beste batek etxe honen mendeurrenerako Koldo Izagirrek landutako lamina bana jartzen die gainean, beste batek harpidedunen izena eta helbidea daramaten papertxoak, eta astekariak postaz bidaltzeko zorro batean sartzen ditu makinak. Honek mekanikoki mozten du eta ondoren beste pertsona batek hartu eta palet baten gainean jartzen ditu posta kodeen arabera multzokatuta.

 

 

Organikoen edukiontzian utzi berrerabili ostean. (Dani Blanco)

 

 

“Finagoa da pixka bat, zailtasun txikiren bat izan dugu makinarekin, parametro batzuk aldatu behar izan ditugu, baina ongi geratzen da, ez digu gerra handirik eman”, dio Egoitz Borda Antza inprimategiko langileak.

"Guretzat berritzailea da, eta gure hornitzaileak esan digunez beraiek ez daude ohituta material honekin lan egitera, beraz, guk dakigula ez da ohikoa", dio Bordak. "Azken finean, gaur egungo garaietara eraldatzen ari zarete proiektua, eta aldaketa guzti hauek guretzat, inprimategi gisa, onak dira".

"Ideala litzateke zorrorik gabe bidali ahal izatea, baina Correos posta zerbitzuak behartzen gaitu helbide bakoitza etiketatu eta zorro batean sartzera. Bestalde, tintak eta plastikoa oso kutsakorrak diren heinean, gu aspalditik tinta ekologikoekin ari gara lanean. Antza inprimategia inprenta berde bat izateko egiten ari den bidea oso interesgarria da, eta guri, proiektu bezala, indar handia ematen digu", dio Bego Zuzak.

Azken urte luzeetan ekonomia sozial eraldatzaileko proiektu gisa, eguneroko jardunarekin lotutako gaiei buelta asko ematen ari da ARGIAko lantaldea. Izan Iberdrola kendu eta Goienerrekin kontratatzea energia, barne-antolaketa horizontaltzeko prozesuak, harpidetza eredu ez-komertzialak, kultura librea sustatzea, eta burujabetzarekin lotutako beste kontu gehiago. Baita, paperezko aldizkari  bat izaki, ingurumenarekin izan beharreko harremana ere. Zuzaren hitzetan ez da kasualitatea hartutako erabakia, ARGIAn topo egin baitu besteren artean Hernanin eta Usurbilen hondakinen kudeaketaren gaiarekin borrokan ari den jende ugarik. "Oso kontzientziatuta gaude gure hondakinekin, eta gainera, Lasarte-Orian gaude, ondoan erraustegi munstro bat eraikitzen ari zaizkigu, eta ahal dela guk ez diogu janik emango. Horko kea eta zikinkeria arnastu beharko ditugu, baina ez da izango guk paso egiten dugulako eta hondakinen kudeaketa hobeagoaren alde ahal dugun guztia egiten ez dugulako. Pauso txikiak emanez, poz handiak hartzen ari gara, aurretik ezinezkotzat jotzen diren oztopo ugari gainditzen ari baikara".

Makinetara egokitu du Antzak material berria. (Dani Blanco)
Kanal hauetan artxibatua: Ingurumena  |  Gipuzkoako erraustegia  |  ARGIA  |  Lasarte-Oria

Ingurumena kanaletik interesatuko zaizu...
2022-09-29 | Hala Bedi | Hizpidea
Statkraften proposamena. Berriztagarriak bai, ezta? Baina nola?

Statkraft enpresa publiko norvegiarrak Euskal Herrian bi parke eoliko eraikitzeko proposamena egin du, eta harrabots handia eragin du. Berriztagarrien beharra eta naturaren babesa uztartzeko moduen inguruan eztabaida pil-pilean da.


2022-09-29 | Jakoba Errekondo
Zuhaitzen espirituak eta gure motozerrak

Irratsaioa mikazten didaten galdera horietako bat egin didate duela ez asko. Haur-eskola bateko jolastokian bizi zen urki (Betula spp) batek aurten ez du hostorik eman.


2022-09-29 | Garazi Zabaleta
Itturbaltza
“Haragiari fama txarra kentzeko garaia da, gakoa abereen maneiuan dago”

2009tik dihardu Unai Beitia bizkaitarrak Itturbaltza abeltzaintza proiektuan buru belarri, Maider Asla emaztearekin eta honen anaia Unaiekin eskuz esku. Moxal haragiarekin hasi ziren, zuzeneko salmenta eginez, baina urteotan proiektura bestelako espezieak ere sartzen joan dira,... [+]



Irakurrienak
Argia buletina
Egunaren laburpena
zure e-postan
Eguneraketa berriak daude