"Duela urtebete, inauterietan, gaia atera zen festak nola bizi ditugun gaur egun, atzerriko jai batzuek bertakoak baino gehiago zabaltzen ari direla azken aldion... eta horren aurrean atera zen maskaradak ekartzeko ideia, jendeak parte hartu zezan eta jai eredu gisa ezagutu zezan. Maskarada gazteen kontua da, eta hemengo gazteek ezagutzea nahi genuen, nola antolatzen dituzten, eta transmisio lana ere egiten duelako kantuan, dantzan, bertsotan..." Aitor Atxegak horrela kontatu digu Maskarada Aiztondo bailarara ekartzeko ekimenaren sorrera.

Lehenengo urratsa, aurtengo maskaraden erregentarekin harremanetan jartzea egin zuten: Allande Davanten etxera jo zuten, eta asmoa azaldu, alegia, maskarada ekartzea nahi zutela, baina ez "feriako tximino" gisa, bailaran gaia lantzea eta maskaradak erakustea zela helburua. Hauek proposamena onartu, eta urtebeteko proiektua lantzeari ekin zioten.

Bailarako herrietan lanketa bateratua

Aiztondo bailarako herri guztietako kideekin taldea osatu zuten eta Aiztondo Mankomunitatean urte osoko egitasmoa aurkeztu. "Mankomunitatearen laguntzari esker, proiektuak baldintza onetan gauzatzeko aukera" eskertu du Atxegak. Hauek dira burututako ekintzak:

Herrietako kultur asteetan maskaradari buruzko hitzaldia eta argazki erakusketa egin zuten.

Bailarako ikastetxeei materiala pasa zieten, beren webguneetan eskegitzeko. Joaine Etxebeste-k maskaradako dantzak irakatsi zizkien irakasleei, hauek ikasleekin landu eta inauterietako jaietan emateko.

Herrietan lau dantza ikastaro eman ditu Etxebestek, herritar orori irekiak.

Udaletxeei informazioa pasa zaie beren webguneetan eskegitzeko.

Bailarako herriko komunikabideetara ere informazioa zabaldu dute. (Hemen Tolosaldeko Atariak argitaratutako "Maskaradei buruzko jakingarriak"). (Hemen entzungai, Xiberoko Botzak Aiztondoko Maskaradetarako prestatutako emanaldi berezia). (Hemen, Aiztondoko talde antolatzailearen iritzi artikulua).

Maiatzaren 7an Aiztondoko Maskaradak

Maiatzaren 6an, larunbatez, 18:00etan Asteasuko plazan egingo diete harrera instituzionala bailarako udal ordezkariek eta Udalbiltzakoek. Maiatzaren 7an, berriz, hauxe izango da egitaraua:

10:00. Asteasuko plazan barrikadak.

11:00. Alkizako Leten barrikadak.

12:00. Adunako plazan barrikadak.

13:00. Zizurkilgo udaletxe aurrean barrikadak.

14:00. Bazkaria Larraulgo frontoian.

16:30. Maskarada jokoak Larraulgo plazan.

Kauteren sermoia egiteko Aiztondoko herriei buruzko pistak pasa dizkietela esan du Atxegak, eta emanaldiko hainbat pasarte euskara batuan idatzita banatuko dituztela aulkietan, entzuleek emanaldia jarraitzeko makulu modura. Baina "maskarada jokoak bere horretan" mantentzea izan dela helburua.