Beste zazpi udal auzitara Espainiako gobernuak, aktak euskaraz bidaltzeagatik
Amezketa, Beizama, Elgeta, Gaintza, Oiartzun, Oñati eta Usurbilgo udalak auzitara eramango ditu Espainiako Gobernuaren EAEko ordezkari Carlos Urquijok, aktak euskaraz bidaltzeagatik, UEMAk salatu duenez.
aurre egingo dieten hedabide independenteak
Duela hilabete Aduna, Arama, Altzaga, Antzuola, Bergara eta Itsasondoko udalek ere helegiteak jaso zituzten arrazoi beragatik.
Bestalde, Zeraingo Udalak UEMAn sartzeko hartutako erabakiaren aurkako helegitea jarri du Urquijok, Berastegiko Udalarekin egin bezala.
Maren Belastegi UEMAko lehendakariaren hitzetan “une hauetan euskararen ofizialtasuna bera ari da zalantzan ipintzen. Helegiteon bitartez, esaten ari zaizkigu euskarak, erdara ere erabili ezean, ez duela balio ofizialik administrazio arteko harremanetarako. Eta kontua da, gaur egungo euskararen legea oinarri hartuta, ez daukagula epaitegiek arrazoia emango diguten ziurtasunik”.
“Benetan kezkagarria da euskararen aurkako erasoaldi hau hartzen ari den tamaina”, gehitu du. “Euskara sustatzeko hizkuntza politika eraginkorra egiten saiatzen gara UEMAtik. Eta horregatik, euskararen aurkako erasoaldi zabal honetan, ari da Urkijo UEMAren aurka ere”.
