TTIPen negoziazioei oniritzia eman dio Europako Legebiltzarrak

  • Europako Legebiltzarrak EB eta AEBen arteko merkataritza eta inbertsio hitzarmenari (TTIP) buruzko erabakia onartu du Estrasburgon egingo den saioan. Hala, gauzatu egin da ekainean bertan behera utzitako bozketa.


2015eko uztailaren 07an - 14:59
TTIPek aurreikusten dituen ISDS ebazpen-auzitegiak izan dira orain arteko desadostasunen jatorri nagusia.

Aurreikusita zegoen ekainaren 10ean bozkatzea TTIPen gaineko erresoluzioa, baina Martin Schulz Legebiltzarreko presidenteak bozketa sine die atzeratu zuen, adostasun falta zela eta. Emandako argudioa izan zen jatorrizko testuari aurkeztutako zuzenketa kopurua handiegia zela, 200 inguru.

Aldiz, TTIPen aurka dauden talde politikoen eustez Schulzek hitzarmenaren aldeko jarrera nagusi izango zela ziurtatu nahi zuen, eta hori ez zegoen batere garbi ekainaren 10ean. Askok antidemokratikotzat jo zuten presidentearen erabakia, araudiaren barrukoa izan arren.

Auzitegi pribatuak enpresa handientzat

Desadostasunaren muina hitzarmen transatlantikoan aurreikusita dauden ISDS motako auzitegiak dira. Haien bitartez, atzerriko konpainia batek estatu edo eskualde baten kontrako salaketa jar dezake, hark onartutako legediak kalte egin diola –irabaziak gutxitzea izan daiteke kalte bat– uste badu.

TTIPen aurkariek auzitegi pribatutzat jotzen dituzte, ohiko justizia administrazioari izkin egiteko aukera ematen baitiete konpainia handiei.

Hasiera batean, talde sozialdemokratako kide asko ez ziren ados agertu TTIP barruan ebazpen-auzitegi horiei eman nahi zitzaien formarekin. “TTIP nahi dugu, baina ISDS pribaturik gabe”, adierazi zuten sozialdemokraten bozeramale batzuek. Haien ezezkoak kolokan jarri zuen erresoluzioa onartzea.

Sozialdemokraten jarrera aldaketa

Azkenik, sozialdemokratentzat nahikoak izan dira Europako Batzordeak egindako promesak. Hain zuzen ere, ISDSetan zenbait aldaketa ezartzeko konpromisoa agertu zien Batzordeak, funtsean auzitegiaren izaera eraldatzen ez dutenak baina, nonbait, ahots kritikoak apaltzeko balio izan dutenak.

Aldaketa nagusiak bi dira: batetik, auzitegia epaileek osatzea, eta ez ebazleek; alde nagusia da ebazlea edonor izan daitekeela, zuzenbidean aditua izan edo ez. Bestetik, aukera egongo litzateke auzitegien ebazpenen aurka helegitea aurkezteko, hasiera bateko aurreikuspenetan ez bezala.    

Legebiltzarrak onartuko duen erresoluzioa, teorian, Europako Batzordeak AEBekin negoziatzeko garaian kontuan hartu beharreko irizpide sorta bat da. Euskal Herrian TTIPari ez! kanpainako Jose Ramon Mariñoren arabera, horrek ez dio baldintza esturik ezarriko europar talde negoziatzaileari, “erresoluzioak dioenaren %80 edonork onartzeko moduko orokorkeriak baino ez dira eta”.


Kanal honetatik interesatuko zaizu: TTIP/TAFTA
2016-11-23 | Unai Brea
CETA akordioa Europako Auzitegian aztertzeari ezetz esan dio Europarlamentuak

Europako Legebiltzarraren gehiengoak ezetz esan dio Europar Batasunaren eta Kanadaren arteko merkataritza eta inbertsio ituna (CETA) Europako Justizia Auzitegiak azter zezala eskatzeko aurkeztutako mozioari. 258 parlamentarik bozkatu dute proposamenaren alde, eta 419k aurka... [+]


2016-11-10 | Unai Brea
Júlia Martí (Euskal Herria TTIPari Ez! kanpaina):
"Valoniak erakutsi du merkataritza askeko akordioei aurre egitea posible dela"

“TTIP eta CETA ezartzearren herritarrek aukeratutako parlamentu eta gobernuen aurka joko dutela frogatu du Valoniarekin gertatutakoak”, diosku Júlia Martík, Euskal Herrian TTIPari Ez! kanpainako bozeramaileetako batek. Azaroaren 5ean merkataritza askeko... [+]


TTIP eta CETA akordioen aurkako mobilizazioak larunbatean Hego EHko hiriburuetan

Larunbatean, azaroak 5, Hego Euskal Herriko hiriburuetan TTIP eta CETA akordioen aurka mobilizatzeko deia egin dute Euskal Herriko Eskubide Sozialen Kartak eta TTIP/CETA Ez plataformak.


2016-10-30 | Juan Mari Arregi
Ez ezazu irentsi

Hainbat plataforma sozialek ohartarazi dute zein ondorio izango dituen AEB eta EBren arteko merkataritza eta inbertsio itunaren (TTIP) negoziazioak. Munduko merkatu handiena sortuko du. Baina itun hori, CETA edo beste batzuk bezala, ez da merkatu akordio hutsa. Enpresa handiei... [+]


Eguneraketa berriak daude