Gainera, Espainiako presidenteak Konstituzionalari eskatu dio parlamentuko mahaiari deklarazioa hartzeko, hartara ardura penalak exijitu ahal izateko.

La Vanguardiak esplikatu duenez, Rajoyren asmoa zen asteazkenean bertan Konstituzionalak Kataluniako parlamentuari gogoraraztea Erreferendumerako Legea ilegala dela. Hori dela-eta, oposizio katalanak asteazken honetako saio parlamentarioa luzatzeko asmoz joan dira legebiltzarrera, epaitegiko mezua iristeko tartea egon dadin.

Baina ez da halakorik gertatuko, Konstituzionalak asteazkenean aurreikusita zeukan lana bukatutzat eman duelako. Ondorioz, Rajoyren eskaerei emandako erantzuna ostegunean argituko da; eta egun berean Kataluniako auziarekin zerikusia daukan beste gai bat ere izango dute mahai gainean: Carme Forcadell parlamentuko presidenteak Konstituzionaleko kideak ezesteko asteazken honetan egin duen eskaera.

Gauzak horrela, Kataluniako parlamentuko saioa asko luzatu arren, probableena da Katalunian erreferenduma egitea ahalbidetuko lukeen legea onartzea Junts pel Si eta CUPen botoekin eta Catalunya Si que es Pot-eko kide batzuen abstentzioarekin.