Epailearen ustez, "begi bistakoa da konpontzen zailak edo ezinezkoak diren kalteak" eragin dituela Iruñeko Udalak hartu dituen neurriak. "Eredu aldaketaren ondorioz, haur ugarik aldatuko dute eskola, eta horrek eragina izango du gurasoengan eta haurren formakuntzan", adierazi du epaileak.

0-3 urte arteko zikloan, umeek hezitzaile bera izaten dute normalean Iruñeko haur eskoletan, eta lotura hori "hautsi" egingo luke eredu aldaketak, epailearen arabera. "Haurrak zentroan geratzen badira, hezitzaileak aldatu egingo dira, oraingoek ez baitute gaitasunik haurrak euskaraz hezteko".

Epailearen arabera, "egia da administrazioak dokumentazio sakona aurkeztu duela" eredu aldaketa azaltzeko. Edonola ere, kasu horretan "kolokan" daude dokumentazio horien "neutralitatea eta egiazkotasuna, zalantzan dauden erabakiak justifikatzeko eta defendatzeko txostenak" baitira.

Epaileak gehitu du "kontuan hartzekoa" dela aurrez abisurik jaso ez duten hainbat gurasori neurriak eragin dien kaltea. "Garrantzia handiko gaia da hori. Espainiako Konstituzioko eskubide bati ere eragiten dio, eta horregatik, helegiteak aurkeztu dituzten gurasoen interesei garrantzi handiagoa eman behar zaie", azaldu du epaileak.

Epailearen ebazpena ez da auziari buruzko epaia. Berak kalkulatzen du, Udalak helegitea jarriko diola ebazpen honi eta azken epaia asko atzeratuko dela. Horregatik, epaileak uste du auziari buruzko epaia ikasturtea hasi ondoren iritsiko dela eta ordurako aldaketak jasaten dituzten haur, guraso eta langileek atzeraezinezko kalteak jasoko lituzketela, esate baterako hizkuntza aldaketarekin, zentro aldaketan, matrikulazioan edo lanpostuan. Bere esanetan, kalte horiek guztiak saihesteko hartu du behin-behineko erabaki hau.

Iruñeko Udalak urte hasieran erabaki zuen Donibane eta Arrosadiko Printzearen Harresia haur eskoletako hizkuntza ereduak aldatuko zituela euskarari leku egiteko. Aurrematrikulazioen arabera, irailetik aurrera euskarazko ereduak eskainiko lituzketen bi ikastetxe hauetako plaza guztiak bete dira eta 56 haur itxaron zerrendan daude. Guztira 17 haur eskola daude Iruñean eta horietatik bitan bakarrik eskaintzen da euskarazko eredua. Udalaren eredu aldaketekin 17 ikastetxeetatik 4tan egongo da aukera euskarazko ereduetan matrikulatzeko. Orain, hala ere, epai honek bertan behera utzi du Udalaren erabakia.

Iruñeko Udalak helegitea jarriko du

Ebazpen judizialari helegitea jarriko diola iragarri du Joseba Asiron Iruñeko alkateak ostiral arratsaldean emandako prentsaurrean. Bertan azpimarratu du epaileak kontuan hartu dituela helegitea jarri duten 53 familien eskubideak, baina bazterrean uzten dituela beste familia askorenak: batetik, euskaraz ikasteko eskaera egin duten 200dik gora familiarenak; bestetik, ebazpen honek eragindako beste 1.300 familiarenak.

Arratsaldeko 15:00ean ezagutu dutela ebazpena sare sozialetatik eta premiazko balorazioa dela zehaztu du alkateak. Azpimarratu du Iruñeko 17 ikastetxeetatik bitan bakarrik ikas daitekeela euskaraz haur-eskoletan eta euskarazko plazak ez direla iristen eskariaren %10era. Iruñean, lehen hezkuntzan D ereduaren matrikulazio datuak %30era iristen direla azaldu du. Epailearen ebazpenak familia horien guztien eskubideak ez dituela aintzat hartu esan du Asironek.

Aranzadiko Laura Berro, EH Bilduko Maider Beloki eta Edurne Eginok lagundu dute mahaian. Berrok eta Eginok, Aranzadi eta Ezkerraren sostengua adierazi diote Udal Gobernuari. Eginok epeak oso estuak direla gogoratu du, matrikulazio prozesu osorako hiru hilabete behar direla, maiatzaren amaieran bukatzen dela eta oraingoa geldiarazten bada, ez dakiela abuztuaren 15erako haur eskolak irekitzeko moduan izango diren.

Udalak orain 15 egun ditu ebazpenari helegitea jartzeko. Sare sozialetatik deituta, halaber, biharko bilkura deitu da 12:00etarako Iruñeko Udal Plazan ebazpen judiziala arbuiatu eta haur eskolen aferan Udalari sostengua adierazteko.

Albisteak hautsak harrotu ditu sarean: