Enric Duran, bankuetatik 500.000 euro inguru “desjabetu” zituen kataluniarra, asteartean ez zen epaiketaren lehenengo saiora aurkeztu. Abokatuarekin konfiantza galdu duela adierazi du, eta desobedientziaren bidea hautatu du, haren esanetan, bere eskubideak defendatzeko. Ohar batean azpimarratu du absoluzioa ez den beste epairik ez duela onartuko, bankuak kondenatu beharko bailirateke, eta ez bera.
Kredituak eskatuz 39 banketxetatik Duranek 2008an milioi erdi euro atera zituen eta gizarte eraldaketa sustatzen duten erakundeei eman zien. Orain, finantza erakunde horietatik hamalauk zortzi urteko zigorra eskatzen diote epaileari. Hainbat mediok bankuen Robin Hood bezala izendatu duten gazteak salatu duenaren arabera, epaiketa hasteko hiru aste falta zirela ohartarazi zuten prozesuaren hasieraz. Gainera, abokatuak ez omen dio konfiantzarik helarazten eta bere defentsarako eskubidea urratuta ikusten du. Lehen jardunaldian ez agertzeagatik Fiskaltzak eta akusatzaileek Duran aurkitu, atzeman eta berehala kartzelan sartzea eskatu dute.
Iruzurra egin aurretik jabetze bidegabe bat egon behar duela azaldu du Enric Duranek oharrean, eta kasu honetan bera ez dela hurkoaren ondasunak lapurtu dituena. Bankuak bezeroek gordailuetan uzten dieten diruarekin etengabe aberasten direla, eta hori bidegabeko jabetzea dela azpimarratzen du.
“Banketxeak ebidentzian utzi eta dirua herritarren mesedetan jartzeagatik” jazarria sentitzen da Duran. Egin duena ez du iruzurtzat, horretarako aberasteko xedea egon behar duelako bere ustez. Ekintzen “motibazio etiko eta solidarioarengatik” deliturik ez duela egin azpimarratu du, eta horregatik dio ez duela absoluzioa ez den beste epairik onartuko.
Otsailaren 2an epaituko dituzte beste hamaika bakegile, uztailaren 23an autopista blokeatzeagatik. Elkarretaratzera deitu du Bake Bideak, datorren ostegunean 13:00tan jarriz hitzordua Baionako auzitegi aitzinean.
Euskal Hirigune Elkargoaren babesarekin, euskaraz erantzundako zientzietako azterketen zuzenketa antolatu dute asteartean Baionako Arteen Hirian, eskatzen diren baldintzak errespetatuz.
"Duela gutxi arte osoki euskaraz egiten zuten gure ikasleek brebeta eta orain zientzietako froga euskaraz egitea debekaturik dugu".