“Azoka hedatzen ari gara, baina gure neurrian, era kontrolatuan”
2019an hasi zen Ziburuko azoka eguneko ekitaldi gisa, baina azken urteetan azoka egunaz aparteko ekitaldiak antolatu izan dira inguruko herrietan ere: Azokaroa da. Ladix Arrosagarai Baltsan elkarteko kidearekin mintzatu gara Azokaroaren nondik norakoez.
Ziburuko azokan 20 minutuko sei liburu aurkezpen izaten dira, eta 2022ko ekitaldian ohartu ziren ez zela nahikoa: “Horregatik, Joanes Etxeberri Ziburukoa idazlearen aurkezpena egin genuen azoka egunetik kanpo, eta 35 bat pertsona bildu ginen Ziburun. Horrek erran nahi zuen azokatik at ere jendeak bazuela horrelakoen gogoa”.
2023an probatzen segi zuten eta bi ekitaldi gehiago antolatu zituzten: Rafa Rueda eta Gotzon Barandiaranen Hitzen Ahairera, eta Miren Azkarateren Ikusezinak liburuaren aurkezpena. Berriz ere ontsa hartuak izan ziren. Eta horrek 2024an Azokaldia antolatzera eraman zituen: "Azokak bere mugak hunkitu zituen, eremu eta denbora aldetik. Bi egunetara pasa? Ez, Baltsanen musu-truk aritzen gara eta pisuegi gertatuko zitzaigukeen. Lapurdi kostan arras guti gara euskal hiztunak, beraz, sortu behar dira momentuak euskaldunak batu, komunitatea indartu eta euskaraz goza dezagun”. Horregatik, aurreko hilabetean, maiatzean, azoka inguruko herrietara zabaltzea pentsatu zuten eta iazko edizioan lau ekitaldi egin zituzten Urruñan, Azkainen, Donibane Lohizunen eta Ziburun. “Lehen auzo ditugun herri horietatik datoz Ziburuko Azokara eta guk ere zerbait itzuli behar genien, eta horrela berretsi dugu jendeak baduela interesa, 30-40 bat herritar bildu izan baitira ekitaldietan”. Urruñan Ikastolako Euskaraz Bizi Batzordearekin antolatzen dituzte ekitaldiok, Azkainen irakurle taldekoekin eta Donibane Lohizunen AEKrekin: “Kezka berberak partekatzen ditugu”.
Eta 2025ean? Lehenik eta behin izen aldaketa gauzatu dute, Azokalditik Azokarora. “Aurten Euskaraldia maiatzera aurreratu da, eta ondorioz, ikusten genuen nahasgarria gerta zitekeela Azokaldiarekin. Hortik dator izen aldaketa”. Eta bada bestelako aldaketarik ere, iaz auzo herrietara hedatu bazen Ziburuko azoka, aurten auzo herrialdera hedatu da, eta Nafarroa Beherako Ortzaizen antolatu dute ekitaldi bat: Uxue Alberdi idazleak Hetero liburua aurkeztuko du Menta liburu-dendan.
Arrosagaraik zehazten du Ziburuko azokak, bere xumean, izaera nazionala duela. “Baltsanek eta ARGIAk antolatzen dugu eta Euskal Herriko herrialde guztietatik datoz argitaletxeak eta jendea. Aurten Ortzaizera zabaldu gara eta, zergatik ez, datozen urteetan Bera, Lesaka, Irun edota Hondarribira: ez dugu muga hautsiko horrekin, baina gainditu bai, eta hori garrantzitsua da guhauren buruetan bereizten gaituen muga desagerrarazten joateko”.
Aurten lehenbiziz ere, bi hedabide ekitaldi baten bueltan jarri dituztela dio, horrela Euskal Irratiak eta ARGIAk Euskara sortuz (duin) bizi?, mahai-ingurua antolatu dute Amagoia Gurrutxaga eta Ximun Fuchekin. “Horrelakoei ere eutsi nahi genieke, euskararen edota euskal kulturaren ingurumarian izan daitezkeen hausnarketak eta eztabaida esanguratsuak lantzeko. Euskarak egiten gaitu herri, eta kulturak herri bizi; beraz, sorkuntza lagundu behar dugu, bestela gure kultura folklorizatuko da. Azokaroarekin, Ziburuko azoka hazten doa pixkanaka, baina bere neurrian, era kontrolatuan”.
(Azokaroari buruz gehiago: Azokaroa: sei ekintza kultural Ziburuko 6. azokaren atarian)
Ziburuko Azokaren karietara abiatu zen Azokaroak aurrera jarraitzen du Ipar Euskal Herrian eta ostiral honetan poema errezitaldi musikatuaz gozatu ahal izango dute Euskal Urruñako Berttoli kultur elkartean, 19:00etan: Maddi Sarasua itsasuarrak idatzitako Biharraren hegietan... [+]
Ekainaren 7an izango da Baltsan elkarteak eta ARGIAk elkarrekin antolatzen duten Ziburuko Euskal Liburu eta Disko Azoka. Seigarren edizio honetan Aurelia Arkotxa izango da omendua eta egitarau oparoa ezagutzera eman dute prentsaurrekoan. Ziburuko Azokaren uhina inguruko... [+]
Ziburuko Liburu eta Disko Azokaren 6. edizioa ekainaren 7an izango da. Girotzeko eta azokaren eragina inguruko herrietara zabaltzeko, aurreko asteetan zehar sei ekintza kultural antolatu dituzte Baltsan elkarteak eta ARGIAk elkarlanean. Lehena martxoaren 30ean izango da,... [+]
Apirilaren 30etik aurrera Azokaroa-ren lehen printzak sumatuko dira Ipar Euskal Herriko zenbait txokotan. Uxue Alberdi egongo da Hetero liburua aurkezten, Maialen Lujanbiok errezetaldia eskainiko du eta Maddi Sarasuak bere liburuaren aurkezpen musikatua egingo du senide eta... [+]
Euskara hutseko liburu eta disko azoka euskaraz “normalki, lasaiki eta naturalki” bizitzeko gunea bilakatu da. Urtez urte ekitaldiak aurrera egiten du eta euskaltzaleentzat ekitaldi garrantzitsuenetako bat bihurtu da, azokaren antolatzaileek nabarmendu dutenez... [+]
Ziburuko Euskal Liburu eta Diskoen Azoka iragan da ekainaren 1ean, 40 bat argitaletxe eta diskoetxe eta milaz gora bisitari elkartuz herriko plazan. Euskara ala ezkara lelotzat zeukan bosgarren edizio horren balorapen baikorra egin dute antolatzaileek: jendetza bertaratu da,... [+]
Ziburuko Euskal Liburu eta Diskoen Azoka iragan da ekainaren 1ean, 40 bat argitaletxe eta diskoetxe eta milaz gora bisitari elkartuz herriko plazan. Euskara ala ezkara lelotzat zeukan bosgarren edizio horren balorapen baikorra egin dute antolatzaileek: jendetza bertaratu da,... [+]
Berrogei argitaletxe eta diskoetxe, horietarik bederatzi berri, eta 120 salmahai bosgarren Ziburuko liburu eta disko azokan. Ekainaren lehenean ospatuko dute Baltsan elkarteak eta Argia hedabideak
Argitaletxeez gain, diskoetxeak egonen dira Ziburuko Azokaren baitan. Horietariko batzuen sorkuntzak zuzenean deskubritzeko parada izanen da aurtengoan ere azoka.
