ARGIA.eus

Itzulpen automatikoa / Machine translation

Eustetik haustera

Argazkia: Kulturaz Kooperatiba

Ederra lasaitua hartzen dena kortse bat askatzen denean. Hogei bat botoi, batak bestea gehiago estutzen eta arnasa itolarrian. Obra honetako pertsonaiek ez dute, ez, bizkarreko minik, gorputz femeninoak estilizatzeko jantzi dute prenda hau. Tente mantentzen ditu, erortzeko aukerarik ez baitiete ematen euren buruei. Azukrea mendeko bihurtzeraino dastatu dute ohikoa dirudien merienda batean, edo agian, batu eta euren gauzez hitz egitea da benetako adikzioa. Brandya, esango nuke, antzezlanaren nolakotasunaren zaporea dela, absurdoaren garapena, erridikulua dena are patetikoagoa bihurtzeko ahalegina. Eta era berean aktoreen errealitatea islatu nahia.

'Hiru kortse, azukre asko eta brandy gehiegi'
Kamikaz kolektiboa
NOIZ:  Irailak 25
NON:  Gazteszena (Donostia)

Fikzioa fikzioaren barruan. Bridgerton telesail ospetsuan oinarritu dira obra honetako aktore eta sortzaile diren Amancay Gaztañaga, Erika Olaizola eta Iraia Elias eta hura parodiatu dute. Pasteltxoek eta teak identitaterik gabeko hiru emakume batu ditu mahaiaren bueltan: emakumea I, emakumea II, emakumea III. Ezer interesgarririk ez dute hizketagai, bizpahiru esaldi xalo eta Joshua, hirurek maite duten gizona. Hasi da jolasa: imitazioa, mugimenduen errepikapena, ahotsaren tonu agudoak, ibilera mekanizatuak, postura arraroak eta giroa bihurritu duen hainbat jarrera. Aktoreen arteko konexioak eta interpretazioak arretaz mantendu du ikuslea lehen eszena luze honetan, erritmoa eta musikaltasuna emanez, barrea ahotik ahora kutsatzera helduz. Hiru emakume elegante, politikoki zuzenak izateko saiakerari eusten eta, era berean, gizon bera gustuko dutelako borrokan. Azukre guztia odolean, gehiago ez mahai gainean. Intentsitatea gora, algarak ere bai.

Kontsumitzen dugun fikzioari leku fisikoa eman diote obran, literalki lauki baten barruan eginez interpretazio hori. Lerroa gainditzean, ordea, pertsonaiak desagertzen eta aktoreak azaltzen dira, bizitakoa euren errealitatera ekarri eta, antzezteari utzi gabe, hausnarketara bultzatuz, Kodea hori da. Antzezlanak Kamikaz kolektiboaren zigilua darama garbi, antzerkia eta genero problematika batzen dituen proposamena baita, feminismoaren aldarriak ardatz dituena eta, era berean, antzerki konbentzionalaren mugekin jolasten duena adierazteko moduari dagokionez.

Obrak emakume guztiek identitatea libreki garatzeko beharrari eusten dio, eraikitakoa hautsi nahian. Eraikitako hori erakusteko, ordea, Bridgerton gisako goi mailako familia aristokrata bateko emakumeen eredua erabili dute, zeintzuen bizitza ikuspegiak gainontzeko emakumeonganako boterea zein pribilegioak dakarzkien. Konparazioa egokia ote den galdetu diot neure buruari. Mezuak edo problemari aurre egiteko proposamenak ezer berririk kontatzen ez duela iruditu zaidan arren, ezagutzen dituenak zer ikusiko duen badaki, eta aretoa beteta zegoen.


Kanal honetatik interesatuko zaizu: Antzerkia
2024-02-28 | dantzan.eus
Lau pastoral plazaratuko dira 2024 urte honetan

Aurtengo urtea emankorra izango da pastoralei dagokionez, lau pastoral emango baitira; bi Zuberoan eta beste bi Zuberoatik kanpo: Iruñean (Nafarroa) eta Xarneguko (Lapurdi-Nafarroa Beherea) zonaldean. Gure herriko lau historia ezagutaraziko dira oholtzan antzerki,... [+]


Xabin Fernandez eta Intza Alkain. 'Kanpora sartzen' antzezlana
"Zuen bizitzan lehen aldiz, herrian ikusiko duzue GIBa"

2013an, medikuaren telefono deia jaso zuen Xabin Fernandezek (Legorreta, Gipuzkoa, 1985). Diagnostiko garbia eman zioten: GIBa. “Seropositiboa zara”. Bizitzak 360 graduko buelta eman zion orduan. Mamuak agertu zitzaizkion: beldurra, amorrua eta lotsa, besteak beste... [+]


2024-02-13 | Euskal Irratiak
Oier Araolaza
"Libertimenduak herrietako harremanak erregulatzeko eta egituratzeko tresnak dira"

Nehoiz baino negu epelagoa izanik ere, ihauteek udaberriari dei eginen diote. Ihauterietako asteburu gotorrena heldu da. Irisarrin Donibane Garazin, Donostiako Añorga auzoan edota Iruñean libertimenduak izanen dira, Irurin maskaradak eta Lapurdiko hamaika herritan... [+]


Eguneraketa berriak daude