ARGIA.eus

2021eko urtarrilaren 16a

Izan ginena lurpetik atera

Iker Barandiaran @IkerBarandiara
2020ko abenduaren 20a
La excavadora taldeak izen bereko diskoa kaleratu du Mauka Musikagintzarekin.
La excavadora taldeak izen bereko diskoa kaleratu du Mauka Musikagintzarekin.

Azken garai luzean bizitza tristea tokatu zaigu, edonor amorratzeko modukoa; hainbeste, ezen irudikatu nahi ez genuen europar kutsuko etorkizun antisozial, etxetik-lanera-lanetik-etxera, lagun, garito eta rock-and-rollik gabekoa bertan baitaukagu. Eta ez dakigu buelta noiz eman ahal izango diogun. Bada, halako testuinguruan, eskarmentu dezente eta izen onik ez duten Arabako bost musikarik izan ginena lurpetik berriro ateratzeko asmoz hondeamakina martxan jarri dute eta bazterrak nahasteko asmo sutsua daukate. Izan ere, ez daukate ezer galtzeko!

Gatillazo eta La Polla taldeetan luzaroan aritutako Txiki kantak idazten hasi zen eta Gatillazo, Rockaina eta Salvate Si Puedes-eko partaide eta lagun Angelillo idazteari batu zitzaion gero. Handik gutxira heldu ziren Buton (Gatillazo, Al Karajo), Mikel (Childrain, Vicepresidentes) eta Pela (Obligas, Sumision City Blues, Marky Ramone…), bakoitza bere etxekoa, baina egoeraz nazkatuta beren alea jarri eta emaitza aberasteko gogoz.

Txikiren kantek Arabako lautadako punk-rock etiketadun oinarria dute –ezin du hori ezkutatu–, baina kantei ñabardura askoz gehiago batzen zaizkie, tartean hard-rocka eta rock urbanoa, kaletarra deitzen zaiona. Boskoteak lortu du soinu borobila.

Hala, Arabako lautadako eta 1977ko punkaren riff itsaskorrak batez ere Mala música eta Ceniza piezatan agertu arren, badira bestelakoak ere: hauspotu eta punk-rock oldarkorragoa egiten dute Kimika, La fábrica de gas eta Animales-en gisako kantetan. Ukitu kaletarra nagusitzen da gainontzeko kantetan. Hitzetan erabat gordinak dira Futuro eta Viejas mentiras de viernes, Perder el vicio-k 80ko hamarkadako arrasto handia dauka, Contra el suelo balada bat da, La reina de la fiesta se hace esperar su garrak dituen hard-rockean biderkatzen da, La excavadorak keinu berezia egiten die rock-and-roll garitoetan batzen ziren langileei, eta azkenik, Tiempos diferentes hainbat belaunaldi batzen dituen hit-a da.
Diskoa urtarrilaren bukaeran izango da eskuragarri.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Diskoak

Diskoak kanaletik interesatuko zaizu...


ASTEKARIA
2020ko abenduaren 20a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude