ARGIA.eus

2020ko urriaren 20a

Amildegi ertza zirikatu nahian

  • Hala Bedi Irratiko mikroen heroiek, Herr Mundinak eta Maese Cthulhuk, Desde el abismo: The Disappointing Exposition erakusketa aurkeztu dute Gasteizko Zuloa Irudia liburu denda ezagunean. Mundinaren ilustrazio psikotronikoak eta Cthulhuren collage lotsagabekoak biltzen ditu esposizioak, mundu berri eta hobeari atea irmotasunez irekitzeko.

Marta Sendiu Zulaica @martasendiu
2020ko urriaren 18a

Izen bereko irratsaioko uhinetatik Zuloako sotora egin dute salto bi artista grafikoek. Horma zuriak tentakuluz eta kolore beltzez marraztu dituzte, baina haien umoreak bizia ematen dio kutsu underground-a gainetik kendu ezin duen irudi bilduma honi. Bi ildo nagusitzen dira areto txikian: Mundinaren iruditedian gizakiak ageri dira, edo behintzat gizakiari gerturatzen zaizkion izaki bizidunak eta, Maeseren kasuan aldiz, hitza da ardatza eta ingelesa nagusitzen da haren slogan zirikatzaileetan. Pertsonaia eta logotipo famatuei ironia ukitua ematea da haren berezitasuna.

desde el abismo erakusketa
Gasteizko zuloa Irudia Liburu-dendan
Irailaren 18tik
urriaren 24ra arte

Barre algara oinarri, kritikotasuna lantzea da erakusketaren xede nagusia, eta horretarako hainbat gai erabiltzen dituzte: COVID-19a, VOXeko Abascalen ezjakintasuna, Iturgaitzen euskara maila, Espainiako erregearen bizi estilo ulertezina, Pablo Iglesiasen komunismoa, eta abar. Maeseren lan esparrua kritikoa, intelektuala eta burlatia da, sekula pentsatuko ez zenituzkeen ideiak ageri dira haren koadroetan, hala nola, Espainiako erregearen argazki batekin egindako disko azala. Hor erregeak proposatutako disko baterako abestien izenak aurki ditzakegu, adibidez: Goodbye my brother, Franco`s love eta  Elephants & Prostitutes.

Cthuluren collageekin batera, logotipo eta esaldi motz, baina esanguratsuek apaintzen dituzte Korreria kaleko liburu dendako ganbarako hormak. “Normalaz” azpiko errealitate berri honen irakurketa ezberdin eta kitzikatzaileak ageri dira haien irudi eta marrazkietan eta egunerokotasunaren zentzugabekerien inguruan barre egiteko aukera paregabea ematen dute.

Atzo amildegi ertzaren bazterrean geunden, eta gaur jada amildegia den zulo beltzean barneratuta gaude. Bikote misteriotsu bezain xelebre honen proposamena ez da txarra pentsaezina zen egoera berri honi aurre egiteko. Umore beltzaren bidez gizatasunaren burugabekeriaz barre egiteko tartea eskaintzen dute. Gizakion existentzia patetikoa eramangarriagoa egiteko proposamena. Bai, patetikoak baikara.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Sorkuntza  |  Artea

Sorkuntza kanaletik interesatuko zaizu...


ASTEKARIA
2020ko urriaren 18a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude