ARGIA.eus

2020ko urriaren 26a
Argazki-erreportajea

Europako txerri-ekoizle nagusiaren erraietan

  • Espainiako Estatua da txerrien ekoizle –esplotatzaile– nagusia Europan, hirugarrena munduan, eta aurreikuspenen arabera, sektoreak hazkunde handia izango du datozen urteetan. Etxaldeek akuifero eta ibaietan eragiten duten inpaktu ekologikoari eta krisi klimatikoarekin duten lotura zuzenari buruzko eztabaida azaleratzeaz gain, animaliek jasaten dituzten gehiegikerien inguruko kezka soziala hazten ari da pixkanaka, eta haien aurka egindako indarkeria-irudiak gero eta leku handiagoa hartzen ari dira komunikabideetan.

Aitor Garmendia @tras_los_muros
2020ko maiatzaren 03a

Irudi horiek, oro har, ikertzaileek lortzen dituzte. Kamera eskuan hartuta edo ezkutuko kamerak ezarriz, leku horietara trikimailuz eta abileziaz sartzen dira. Baserri, hiltegi edo laborategietara ezkutuan sartzeak gero eta blindatuagoa den industria baten errealitatea erakusten dio jendeari, kontsumitzaileei. Animaliek sufritzen duten esplotazio sistematikoari aurre egiteko jaio den mugimendu politiko eta soziala ez litzateke egun dagoen egoeran izango, zenbait antolakunde eta ekintzailek egindako ikerketa grafikorik gabe.

Baina denak du prezioa. Aktibisten eta antolakundeen aurkako gerra irekian, haien praktikak jendaurrean ikusgai egon ez daitezen, animalien esplotazioaren industriako lobby boteretsuek beren instalazioetan egindako ezkutuko ikerketak jazartzera bultzatu dituzte erakunde publikoak. Europolek Europako jarduera terroristari buruz urtero egiten dituen txostenetako batzuetan, ezkutuko ikerketa horiek aipatzen dituzte. AEBetan, non animalien eskubideen aldeko mugimenduak ibilbide historiko zabala duen, industria blindatzeko neurriak ez dira ikertzaileen infiltrazioa oztopatzera mugatu, eta haien boterea haratago hedatu dute. Azken hamarkadan, beren instalazioen barruan irudiak filmatzea edo lortzea jazartzen duten legeak bultzatu dituzte lobbyek. Lege horiek, "Ag-gag" izenekoak, eztabaida handia sortu dute, eta auzitegi batzuek konstituzioaren kontrakotzat jo dituzte. Katalunian, Espainiako Estatuan txerri haragi ekoizpenik handiena duen lurraldean, berriki blindaje-neurriak ezarri dituzte instalazioen barruan baimenik gabe filmatzen dutenen aurka, gisa honetan informaziorako eskubidea eragotziz.

Haragi-korporazioen establezimenduen barruan gertatzen dena ezkutatzeko interesaren eta haien propagandaren aurrean, ikerketek informazio garrantzitsua ematen diote gizarteari, eta industria horri aurre egiten dion mugimenduari tresnak ematen dizkiote. Horrela, jendea bultzatzen ari dira animaliek jasaten dituzten kalteen inguruan kontzientzia hartzera eta haien defentsan parte hartzera.

Hainbat hilabetez, animalien eskubideen aldeko ikertzaile anonimo talde batekin batera, Aragoi, Gaztela-Mantxa eta Gaztela eta Leongo 30 txerri-ustiategi baino gehiagora sartzea lortu dut. Beste behin ere, animaliek jasaten dituzten izugarrikeria, gehiegikeria eta albaitarien eta erakundeen arretarik ezaren lekuko izan naiz, baita abere-industriaren gardentasun falta eta animalien ongizatearen legea urratzen dutela ikusi ere.

Datozen asteetan aurkeztuko dugun ikerketak mugimendu antiespezistak sustatutako eztabaidari ekarpena egin nahi dio, gizakiak ez diren animalien esplotazio sistematiko eta estrukturalari buruzko informazioa emanez.

  Ikertzaile bat txerri ustiategi baten perimetroa arakatzen, hara sartu aurretik. Bere helburua da abeltzaintza intentsiboko sistemaren pean animaliek jasaten dituzten gehiegikeriak dokumentatzea. 2019ko azaroa / Gaztela Mantxa
  Amatasun gelak korridore batean zehar daude. Ikertzaileetako bat gelaz gela doa. 2019ko abuztua / Aragoi
  Espainiako Estatuan eta Europako Batasuneko lurralde gehienetan legeak aukera ematen du ernaldiko lehen lau asteetan txerriak banakako kaioletan sartzeko, horietan immobilizatuta egoten baitira. Kaiolak baterian antolatuta daude, eta ehunka txerri har ditzakete bata bestean alboan. 2019ko abendua / Aragoi
  Ernalketa-fasearen ondoren, txerri emeak amatasun-eremura eramaten dituzte, eta han berriro burdinazko armazoietan sartuta egoten dira, beren buruaren gainean biratzea galarazteko. Kaiola horietan bost aste igarotzen dituzte txerrikiei titia kendu arte. 2019ko martxoa / Gaztela eta Leon
Txerriak amengandik banandu ondoren, trantsizio-eremura eramaten dituzte, eta, ondoren, gizentze-eremura. Lau edo bost hilabetez zementuzko parke txikitan bizi dira, beren pixa eta kakaren gainean. Azkenean hiltegira kamioietan bidaltzen dituzten arte.
Ikertzaile bat oraindik bizirik dagoen txerri bat argitzen. Gizentzeko eremuko korridorean hiltzen utzi dute. Gaixo dauden animaliak hiltzen uztea praktika arrunta da, eta ikerketan bisitatu ditugun etxalde askotan ikusi dugu. Horrek urratu egiten du animalien ongizateari buruzko araudia.
2019ko abuztua / Aragoi
  Txerri batek ondesteko prolapsoa du. Isolatu egin dute, odolak beste txerriak erakar ez ditzan. Animalien ongizateari buruzko arauaren arabera, ebakuntza kirurgikorik egin behar ez bada, animalia hil egin beharko litzateke, haren sufrimendua saihesteko. 2019ko azaroa / Gaztela-Mantxa
Bisitatu ditugun etxalde guztietan ez dute albaitarien arretarik jasotzen. Ezin konta ahala osasun-arazo duten animaliak ez dira artatzen errentagarritasun ekonomikoaren izenean. 2019ko urria. Gaztela-Mantxa.
Amatasun-kaioletan dauden txerrien gorpuak erabat immobilizatuta daude ernaldiaren lehen lau asteetan, Europako araudiak baimendutakoaren arabera. Metalezko egitura horiek, presio eta marruskadura etengabearen ondorioz, zauri eta infekzio ugari eragiten dituzte, oso gutxitan tratatzen dituztenak. 2019ko abendua / Aragoi
Amatasun-kaioletan, txerriek ezin dute beren gorputzaren inguruan biratu eta beren gorotzen gainean erditzen dituzte kumeak. Hilik jaiotzen diren txerriez gain, ahul jaiotzen direnak albaitariaren arretarik jaso gabe hiltzen dira. Espainiako Estatuan animalien ongizateari buruzko legeak aukera ematen du txerri horiek baserrian bertan hiltzeko, buruan kolpe gogor bat emanda. 2019ko maiatza / Aragoi
  Amatasun-eremurako sarreran, txerriei hazia jartzeko erabiltzen diren ehunka kanula daude.
2019ko urria / Gaztela-Mantxa
  Ikertzaile bat biosegurtasuneko edukiontzia filmatzen, txerri-ustiategi baten irteeran. Hilik jaiotzen direnez gain, txerri batzuk ez dira gai esplotazio bizi-baldintza horiei aurre egiteko.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Animalien eskubideak  |  Lehen sektorea  |  Espainia

Animalien eskubideak kanaletik interesatuko zaizu...


ASTEKARIA
2020ko maiatzaren 03a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude