Antton Olariaga

"Nik irudiekin zikindu ditut testuak, orain irakurleari dagokio zikintzen jarraitzea"

Garazi Zabaleta @tirikitrann
2019ko urriaren 13a
Antton Olariaga. Argazkia: Dani Blanco.
Antton Olariaga. Argazkia: Dani Blanco.

Beste urte batez zure marrazkiekin osatu duzu Landareak Lantzen agenda-liburua. Gustua hartua diozu landareak marrazteari, ezta?

Bai. Orain arte urrunetik ikusten nituen landareak, estimatzen nituen, batzuk jan ere egiten nituen, geroz eta gehiago horiekin sukaldean egin… Ni ez naiz baratzikola, baina egia da baratzean kuriositatea baneukala. Horregatik, Jakoba Errekondorekin elkarlanean gustura aritzen naiz, beregandik ikasten ari naiz eta aberasgarria da berak esandakoei nik nire irakurketak gehitzea, marrazki bidez.

Aurten gonbidatu berriak dituzue liburuan…

Zuhaitzak dira aurtengoan gure orrialdeetara ekarri ditugun gonbidatuak, bai. Niri betidanik iruditu izan zaizkit ederrak zuhaitzak, eta zer esanik ez basoa osatzen dutenean! Itzala eta fruituak ematen dizkigute gainera… gustura aritu naiz horiek marratzen.

Berria izan da zuretzat zuhaitzak marraztea?

Beno, betidanik sartu izan ditut nire ilustrazioetan, batez ere paisaia moduan. Haur eta gazte literaturan, esaterako, oso ohikoa izaten da basoaren presentzia, mendiarena, naturarena… Eta nik, betidanik eta erdi inkontzienteki natura esan eta hantxe jartzen dut zuhaitzen bat. Baina noski, identitarioa izan gabe: zein zuhaitz den jakin gabe, zuhaitz abstraktuak ziren. Beste zenbaitetan intentzioz ere marrazten nituen, esaterako, pagoa marraztea betidanik gustatu izan zait hizkuntza grafikoaren aldetik ematen dituen aukerengatik. Beraz, zuhaitzekin harremana izan dut lehenagotik ere, baina ez hain sailkatuta eta bakoitzaren nortasunari hain lotuta.

Nola izan da marrazte prozesua? Zuhaitzei begira denbora luzea eman duzu?

Lehenik zuhaitzetara hurbilketa bat egin dut: euskarri bisualak eskatu dizkiot Errekondori, horrek laguntzen du eta. Gero, horren irakurketa edo interpretazioa egin dut: saihestu egiten dut kopia perfektu bat egitea, zeren, horretarako argazkiak ditugu. Beraz, interpretazio hori egin dut baina zuhaitzen izaerari traizio egin gabe, fideltasun minimoa gordez. Elkarlanean aritzen gara eta beti Jakobaren kontrastea bilatzen dut marrazkiak egiterakoan. Aipatzekoa da, gainera, agenda hau zikintzeko dela. Nik liburuko testuak zikindu ditut nire marrazkiekin eta orain erosleari dagokio bere apunte eta eskemekin osatzea. Tripode bat gara: Jakoba ari da alde batetik, nik jarraitzen diot bere lanari, eta irakurlea da hirugarren hanka.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Landareak lantzen  |  Basoa  |  Antton Olariaga

Landareak lantzen kanaletik interesatuko zaizu...
ASTEKARIA
Azkenak
EGILEA
Eguneraketa berriak daude