Taldekideek beren lehen diskoan oso ondo landu dute dena: doinuak, erritmoak, melodiak, musika tresnak, ahotsak, hitzak, grabazioa, moldaketak nahiz ekoizpena, eta soinu indartsua, zuzena, zehatza, trinkoa eta garbia gauzatu dute. Ozen jarri eta dantza egiteko aproposa.
Afrobeat, funk, reggae eta rockaren eraginak suma daitezke beren kantuetan, euskal sustraiak ere antzematen ahal dira, baina horiez guztiez ederki baliatuta beren doinua eraiki dute, eta Makulu Kenen kantuak erraz ezagutzen ahal dira.
Lasarte-Oriakoa (Gipuzkoa) da taldea. Txus (bateria), Patxus (baxua), Xuber (perkusioa), Xa2makulu (gitarra eta ahotsa), Eider (ahotsa) eta Itxaso (ahotsa) dira taldekideak. Makulu Kenekin hasi aurretik, Potrojorra, Briganthya, Yennin, Iratxo, Underneed, Tabu Tabar, Herrera eta bere kronopioak, Nahiak, Nil eta Musker Oker taldeetan jo dute.
Diskoaren grabaziorako, musikari ugariren laguntza izan dute, eta denak primeran aritu dira beren zereginetan: Enekora (kora), Xabi Beldarrain (surdoa), Josu Gabellanes (pandeiro brasildarra), Arkaitz eta Mikel –Oreka TX– (txalaparta), Igor Gartzia (saxofoia), Iñigo Isasti (tronboia), Gorka Segurola (tronpeta), Asier Suberbiola (biolina), Josu Etxeberria –Oreindik– (ahotsa), Xanti Noriega (gitarra) eta Joan Berenguer (teklatuak). Lagun alaiak, ameslariak eta txantxazaleak dira Makulu Ken taldeko kideak, baina kantuetan kritika, salaketa eta aldarria ere egiten dute, modu zuzenean edo ironiaz.
‘Makulu Ken’, taldearen izena izan ez ezik, filosofia bat ere bada: makulurik gabe hitz egitea, komunikatzea, maitatzea... “Makulu mentalak kendu behar ditugu”, Makulu Ken taldeko kideek beren disko aurkezpenean esan zuten bezala.
Hori egingo dugu: makuluak eta lotsak alde batera utziko ditugu, eta Makulu Kenekin dantza egiten hasiko gara, gorputza mugitzen, irribarrea ahotik kendu gabe.
Harritu nau –zentzu onean– proiektu berri honek. Adiera edo zentzu asko ditu hitzak eta Bergaran Aitor Aldanondok harri baten inguruan sortutako honek baditu hainbat. Urteetan hartutakoa –bizitakoa– nolabait atera nahi izan du lan honetan.
Ibilbide... [+]
Eñaut Elorrietaren inguruko dokumental bat egin zutela-eta, Tabakalerara gonbidatu ninduten orain bizpahiru aste. Gustuz hartu nuen lagunarteko estreinaldirako gonbita, baina zinema aretora hurbiltzean jende asko hasi nintzen topatzen; hor Paul eta Itziar, hor Sarri, hor... [+]
Batzuetan elementu asko elkartu behar dira aurreikusi ez duzun emaitza bat ateratzeko. Hori gertatu da nolabait Gernika eta Bermeo artean sortutako Feline taldearekin. Primeros Auxilios punk taldeko Iñaki Baini-k etxean elektronikarekin jolasteari ekin eta maketa batzuk... [+]
"Hemen, errebelazio bat bezala, espazioa eta denbora argiago ikusten dira". Miren Narbaiza bueltan da berriz, eta eskerrak. Eszenak eman duen kantugilerik berezienetako bat da Narbaiza. Kanta berriak nola gobernatzen dituen ikustea besterik ez dago.
Zeren, sortzaile... [+]
Asko poztu nintzen Artza anaiek diskoetxe berria abiaraztearekin bat Barrakos-en maketa –non erosiko nuen, Boga tabernan?– berreskuratu eta biniloan ateratzeko asmoa zutela jakitean. Izan ere, aipatutako maketa –1990koa– gure musika historian oharkabean... [+]