ARGIA.eus

2020ko abuztuaren 03a

Norberaren lanean sinistearen emaitza

  • Izan

    Kokein.

    Auto ekoizpena.

    Iraupena: 47’25’’.

    15 euro.
Iker Barandiaran @IkerBarandiara
2012ko maiatzaren 20a
Eibarko Kokein taldea indarberrituta eta oso gogotsu itzuli da agertokietara, urte batzuetako isilunearen ostean. Zaloaren ahots sendoak gidatutako talde indartsua da, eskarmentu handia duena eta oraingoan ere pauso irmoa egin dute aurrera begira. Izan disko borobila da, eta taldea sasoi onenean dagoela erakusten du. Taldeko bateria jotzaile Haritz Letek izan du grabazio eta nahasketen ardura nagusia eta lortu du punk-rocka, post-hardcorea, stonerra, hard-rocka, elektronika tanta batzuk zein popa batzen dituen lan honi izaera rockeroa eta soinu zikin samarra gehitzea. Diskoa biniloan bakarrik kaleratu dute, nahiz eta webgunean kantu guztiak doan deskargatu daitezkeen, bat ezik, Ametsen mundura jauzia. Melodia, intentsitatea, zirrara eragiten duten hitzak eta rock estalki gordina guztiak batean.
"Egin dugun diskorik naturalena dela esan genezake, inperfekzioa polita da"

“Behin izandako griñaren ondarea besterik ez gara”. Esango nuke grinak bizi-bizirik jarraitzen duela eta taldea indarberrituta datorrela. Etenak on egin dizue?

Bai, gogoz gaude, jotzeko irrikaz. Hala ere, ez dugu etenik inoiz egin, egia esan. Itzalean eta lokalean zaudenean, ezertan ez zarela ari dirudi kanpotik begiratuta,  baina etengabe aritu gara lanean. Zuzenekoak egiteko beharraren suak mantentzen gaitu beti aurrera begira.

“... baina asko sinisten dugu sinisten dugun gutxian”. Oraingoan Creative Commons-aren aldeko apustu are eta irmoagoa egin duzue.

Disko hau oraindik ere gureagoa egin nahi genuen eta horregatik gure kabuz kaleratzearen erabakia. Nahiz eta esfortzu handiagoa eskatzen digun, gai garela uste dugu. Taldearen eta entzulearen arteko distantzia motzagoa da orain.

Zain egon gabe euskal herritarrok gure eskuetan egiteko daukaguna gogorarazteko irratirako moduko hit aproposa izan daiteke, ezta?

Elkar batzeak ematen duen indarra agerian gelditzen ari da. Badirudi kanta honek bati baino gehiagori zerbait esaten diela. Horrekin gelditzen gara.

Izan edo ez izan, azaleko garezurra ikusita, hori etorri zait gogora. Existentzialistak jarri zarete?

Diskoaren azalak aurpegi aurrean edukitzean egin zezakeen efektua nahi genuen, “izan edo ez izan” antzeko bat. Agian existentzialismoan jausi gara konturatu gabe baina Kokein garela inoiz zalantzan jarri gabe.

Diskoak xehetasun zaindu asko ditu.

Baditu detaileak, xehetasun landuak, baina egin dugun diskorik naturalena dela esan genezake. Guretzat inperfekzioa polita da.

Zaloa, urteetako esperientziak on egin dizu nabarmen. Zorionak! Zer sentsazio dituzu?

Eskerrik asko. Halaxe sentitzen naiz, indarberrituta, harro eta gehiago nahian. Beti ikasten eta esperimentatzen. Pertsonalki eta taldean gogotsu nago, eta Izan disfrutatzeko asmoa dut.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak

ASTEKARIA
2012ko maiatzaren 20a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude