Libano ere herrialde garatua zen, Ekialde Hurbileko Suitza deitzen zuten. Gerra Zibilek eta Israelen erasoek behin eta berriro txikitu dute materialki. Palestinarrek ez dute beren burua garatzeko antolamendurik lortu izan, 1967tik NBEk Palestinako Estatuaren sorrera agintzen badu ere, AEBek eta Israelek –Europako Batasunaren laguntzarekin- behin eta berriz oztopatu dute erakundearen mandatua.
 
Gazari egindako erasoekin Erdi Arora baino Harri Arora itzularazi ditu Israelek bertako palestinarrak. Ondoren, su-etena behar beste luzatzen bada, berreraikuntza lana hasiko da. Europako Batasunak milioika euro bideratuko ditu bere berreraikuntza lanetara eta bere zurikeria garbitzera eta, konponbiderik lortu ezean, bere sorreratik gerra egoeran bizi den Israelek behar denean berriz txikituko ditu behar diren bazterrak.
 
Noiz arte, ordea? Estrategia horrek urteak eta hamarkadak iraun ditzake, baina ezin da etengabe luzatu. Iran moduko batek lortuko du halako batean arma nuklearra eta orduan edo Israelek amore emango du edo eskualde osoa lehertuko da. Edo herritar arabiarren matxinadek gobernuak berenganatuko dituzte eta... Ez da hegemoniarik betirako, historiak behin eta berriz erakusten du hori.
 
Baina AEBen erabateko babesa amaitu barik, Israelek ez du jarrerarik aldatuko. Europako Batasunak, gaur gaurkoz, ez du ez indarrik ez gogorik AEB eta Israel presionatzeko. Aldaketarako ametsik bada egunotan, baina hutsala egia esan, arrazoizkoagoa da pentsatzea Barack Obamaren esperantza izpi hori laster itzaliko dela Gazako hondakinen artean.
 
Gazako herritarrak txikitu ditu Israelek, Hamasen egoitzak, Palestinako Aginte Nazionala ere bai bide batez, baina gorrotoa eta erresistentziarako hazia akuilatzen jarraitzen du, arabiarrak erabat zatituta daude baina nazio bakarraren kontzientzia oso hedatua dago haien artean eta Israelek ezin dezake luzaro iraun gerra eta zanpaketaren zabuan kulunkatzen. Europako gobernuek, bitartean, hau bai, proportziorik gabeko biolentzia hau lasai irents dezakete, Israelgo armada eta gobernua inongo zerrenda terroristetan sartu barik, Gazako gerra krimenak epaitu barik, su-etena bultzatu bai baina hurrengo erasoari ere ateak irekita utziz. Israelen defentsarako.