Uda heltzear da. Badirudi eguraldiak bakeak egin dituela gurekin eta kalean ordu gehiago pasatzea eskatzen digu gorputzak. Are gehiago, giroa lagun, kontzertuez edo kale antzerki ikuskizunez gozatzeko abagunea badugu. Proposamenak ez dira falta, gainera. Urretxu eta Zumarraga lotzen dituen Areizaga Kalebarren plaza Udako Gau Musikalek hartu dute ekainean. Larunbatean Asstrioren kontzertua izango da. Bilboko La Fundición aretoan, Ekainean Txotx ekimenaren baitan, hainbat artisten antzezlan eta dantza saioak (Hnos. Bolinga, Marisa Lafuente & Peru C. Saban...) ikusi ahal dira 19a arte, ardoaz eta pintxoez lagunduta. Donostian ere Antzerkia Kalean zikloko emanaldiak hasiak dira (Markeliñe, Trapu Zaharra...). Bilbon ere Ostiral Kulturalak antolatu dituzte ekainerako Errekalde auzoko kaleetan. Musika, zinema, antzerkia... ekitaldi andana. Eta uda ez da hasi oraindik.

International Penen Kongresuan parte hartuko du lehen aldiz iaz sortutako Euskal Pen Klubak. Laura Mintegi elkarteko lehendakaria eta Lutxo Egia elkarteko diruzaina izango dira hilak 21a bitartean, Bled herrian (Eslovenia). Euskal Pen Klubeko otdezkariek adierazpen askatasunari buruzko ebazpen bat eramango dute, azken urteotan Euskal Herrian itxi dituzten komunikabideen ildotik. Euren asmoa kongresuan izango diren 141 Pen Klubetako ordezkariek (15.000 inguru) onartzea da eta haren ondotik Espainiako Gobernuari bidaltzea.

Itsasertzeko paisaia ederra eta artelanak uztartzen ditu Angelun lehenengoz antolatu den Les Ventinelles biurtekoak. Aurten Flandesko zazpi eskultoreren (Christine Clinckx, Koen de Decker, Dirk Zoete, Heidi Voet...) lanak paratu dituzte Angeluko itsasertzean, kilometro pasatxoko ibilbidean. Horren osagarri, eskulturen maketak eta artisten lan multimediak jarri dituzte Betarix Enea etxean. Bi urtero, kostaldea duen munduko herrialde bateko artista interesgarriak gonbidatuko dituzte euren lanak Angeluko kostaldean jartzera. Izan ere, antolatzaileen asmoa arte garaikidea eta herritarrak harremanetan jartzea da.

Bat proiektua (Bilbao Arriaga Teatroa) jarriko du martxan Bilboko Arriaga antzokiak azarotik aurrera, Lluis Pasqual zuzendari artistikoaren ardurapean. Sorkuntza eta formakuntza xede izanik, Shakespeareren La Tempestad eta Hamlet gaztelaniaz ekoitziko ditu Arriaga antzokiak Valentziako, Kataluniako eta Madrileko hainbat antzokirekin elkarlanean. Guztira, 25 antzezlek eta musikari batek parte hartuko dute. Aktoreetatik hamabi inguru Euskal Herrikoak izango dira. Halaber, antzerki zuzendaritza ikastaroa eskainiko du Arriagak, azarotik otsaila bitartean. Bertako ikasleek Shakespeareren bi lanen muntaian parte hartu ahal izango dute, sorkunta prozesua bertatik bertara ezagutzeko. BAT proiektuak hiru urteko iraupena izango du. Hala, bigarren urtean haur eta gazteei eskainiko die arreta eta hirugarrenean ikusleei.

Herri musiken erakusleiho izateko asmoz, sareratu zuen www.entzun.com webgunea duela hilabete batzuk Entzun aldizkariak. Gunea ez da aldizkariaren bertsio elektronikoa, paperezkoaren osagarria baizik. Pixkanaka edukiak gehitu dituzte eta makina bat albiste, kronika nahiz elkarrizketa topa daitezke bertan. Hona gunearen hainbat atal: berriak, agenda, zuzeneko emanaldien kronikak, maketak (taldeek hiru abesti paratu ahal izango dituzte), euskal musikagintzaren direktorioa, dosierrak...

* * * * * * * * * * * * * * * * * *

Barakarock musika jaialdia antolatu dute estreinakoz Barakaldon ekainaren 18rako. Hamalau talde ariko dira zuzenean, eguerdiko 12:00etatik aurrera. Doinu rockeroak izango dira entzungai Lasesarre futbol zelaian. Izan ere, Parabellum, Reincidentes eta El Ultimo Ke Cierre, MaCarraDa, Segismundo Toxicómano, Lendakaris Muertos eta Txapel izango dira oholtza gainean. Metalak ere izango du lekurik, Hamlet, Tiera Santa, Vhaldemar, Idi bihotz eta Flyin‘ Freak taldeek kontzertua eskainiko baitute.

Pobaleko burdinola eta Bizkaia zubia (zubi esekia) saritu ditu Europako Kontseiluak, kultur ondare gisa duten garrantziagatik. Muskizko burdinolak museoa du iaztik eta Getxo eta Portugalete lotzen dituen zubiaren transbordadorea berritua izan da orain gutxi. Biak ala biak Bizkaiko Diputazioa, Akitania, Katalunia eta Languedoc-Rousilloneko erakundeekin prestatzen ari den Piriniotako Burdinaren Ibilbidearen parte izango dira. Ibilbide honek burdingintzak herriotan izandako garrantziaren aztarnak batuko ditu, Europako Batasuneko Ibilbide Kulturalen Institutuaren ildoak jarraituz.