Berriki aurkeztu den material metaliko batek ordezkatu egin dezake berilioa, aplikazio aeroespazialetan blindaje gisa erabiltzen dena, oso ezaugarri onekoa baina oso toxikoa.
San Diegoko California Unibertsitateko Ingeniaritza Eskolako Kenneth S. Vecchiok zuzendutako taldeak garatu du aipatu materiala. Ingurumenarekiko ez du eragin kaltegarririk eta zurruntasuna altzairuarena da, baina dentsitatea erdia baino ez da. Aluminio eta titanioaren arteko aleazio bat erabili da horretarako eta konprimatu eta berotu ondoren, bi geruzetako xafla bat lortu zuten: Geruza batean zeramika bezain gogorra den titanio aluminiuroaren xafla eta bestean titanioaren aleazio tolesgarri bat. Geruzak milimetro batekoak dira, liburuen orri gisa pilatu daitezke eta nahi den itxura eman dakieke berotu aurretik.
Arkitektura xaflatua natura behatuz erabaki zen, hain zuzen ere haliotis rufescens deituriko moluskuaren oskolaren barne-egitura behatuz.
Material berriaren erresistentzia neurtzeko hainbat froga egin dira, horien artean aipagarriena hauxe: tungsteno-barra bat 900 m/s abiaduran bota zen bi zentimetroko lodierako xaflaren aurka eta barrak xaflaren lodieraren bide erdia baino ez zuen egin.
Une honetan aplikazio errealetarako ahalik eta ezaugarri egokienak izan ditzan azken ukituak ematen ari zaizkio xafla berriari. Horrela, xafla barnean zulotxo batzuk egitea lortu dute, bertan altzairuzko bolak sartzeko eta horrela motelgailuen efektua lortu ahal izateko, edo kablearen funtzioa izango luketen zuntzak sartu dituzte sentsore gisa aritu ahal izateko.

Jarraian emango ditugun datuak Frantziako estatuan joan den urtearen amaieran argitara emandakoak dira. 12 milioi etxe Internetera konektatuta zeuden, aurreko urtearekin alderatuz %12,4 gehiago. Hala ere daturik interesgarriena konexio-motan datza, hau da, konexioetatik %55 banda zabaleko konexioak baitziren, beraz, modem bidezko konexio telefonikoak aldapan behera doaz. Banda zabaleko konexioen %92 ADSL bidezkoak ziren eta gainerakoak kable edo antena bidezkoak. Datu hauek argi erakusten dute erabiltzaileek azkartasuna bilatzen dutela konexioetan eta horren adibide dugu egungo hainbat hornitzailek 20 Mb/s konexioak eskaintzen dituztela. Une honetan gehien kontratatzen diren zerbitzuak pack erakoak dira, adibidez Frantziako hainbat lekutara denbora-mugarik gabe doako deiak egitea edo hainbat telebista-kanal digitaletara irispidea izatea. Hala ere, Frantziako lurralde guztietan ezin dira abantaila hauek izan, horretarako eremu desagrupatua izan behar baitu, beste hitz batzuekin esanda, operadore telefoniko bat baino gehiago aritzen den eremua. Hemen, Espainian gertatzen den bezala, France Telecom-ek oraindik mantentzen du monopolioa hainbat eremutan. Dena den epe laburrean Frantzia osoak desagrupatu bezala funtzionatzea itxaro da. Espainiako datuak ez ditugu esku artean, baina joera oso antzekoa aurreikusten dugunez, garbi baiezta dezakegu modemaren aroa amaitu dela eta, irakurle, etxean Interneterako konexioa behar baduzu banda zabalerako hautua egin behar duzula.