ETAk badu jarduteko indarrik, Ana Isabel Arostegi eta Javier Mijangoz ertzainak tiroz hil ondoren hori begibistakoa da, areago aste berean beste bi ertzain hiltzen saiatu zenean. Indar militar hori, ordea, gero eta ahulagoa den sentsazioa ere gero eta zabalagoa bide da; jarduera politiko soilean aritu behar duenari ere gero eta tarte estuago uzten dio ETAren jarduerak, honek egiten duenaren eragin hurbilekoena bere inguruko esparruan somatzen baita gero eta gehiago. Gehienen esanetan, su-etenaz geroztik, EAJ da ETAren presiogune nagusiena; presio hori areagotzeko ETA noraino irits daitekeen pentsatzeak beldurra areagotzen du.

KONTZERTUAREN negoziazioaren itxiera iragarritakoa baino beranduago dator, etorriko bada. Bi aldeen arteko itunetik ateratzen da kontzertua, baina alde handiak beste erabateko indarra du beti txikiaren aldean, areago oraingoan moduan PPk Madrilen gehiengo osoa badu. Eta areago alde txikia Rabanera moduko infiltratuak baditu. Datorren ostiral hau, hilak 23, izango ei da kontzertuari buruzko akordioa ixteko azken data. Bestela Aznarren Gobernuak urtebetez luzatu egingo ei du, nahiz eta EAJk iragarria duen hori gerra aldarrikapen gisa hartuko lukeela.

ABENDUKO bigarren asteburuan bilduko dira Europako Batasuneko barne ministroak eta orduan erabakiko da zein erakundez osatuko den Europako talde terroristen zerrenda ospetsua. Nahiko garbi dago, dena den, Batasuna ez dela zerrenda horretan egongo, PPk nahiko lukeen bezala. Ikusi beharko da, dena den, «talde terroristekiko laguntza eta sostenguaren» kontzeptua zertan geratzen den, eta horren arabera talde armatuez gain beste era bateko taldeak ere sartzen dituzten. PPk, dena den, Batasuna zerrendan sartzea lortu ez badu ere, honen kriminalizazioan urratsak aurreratu ditu eta ezker abertzaleko alderdi politikoaren aurkako jazarpen judizialerako tartea areagotu du.

ZABALDUA zegoen Nicolas Redondo Terrerosek alde batera utzia zuela Jesus Egigurenek egindako txostenaren eduki nagusia. Eguneroko jardunean ere agerikoak dira tentsio horiek, aurrekontuetan ikusi den legez. Bizkaian eta Gipuzkoan EAJrekin negoziatu eta akordioetara heltzeko prestutasuna agertu duten bitartean, Eusko Legebiltzarrean Nicolas Redondok arbuioaren hautua egin du. Joseba Egibarrek ordagoa jo -denetan ala ezer ez- eta eutsi egin diote sozialistek, oraingoan batera. Astean ikusiko den legez, ordea, sozialisten arteko harremanak hur uherretan dira; Konferentzia politikoan ikusiko da, egiten bada behintzat.

ADIOS-EN erreferenduma egin zen duela hilabete batzuk, eta duela urte batzuk Mendillorrin (egun Iruñeko auzoa). Eta Estatu osoko beste leku askotan ere egin dira Estatuak deitu gabeko erreferendumak. Irailean Gazteluko Plazari buruz egin zenari, halaber, oztopo ugari jarri zitzaion, baina ez zen eragotzi. Oraingoan, Gaztelu Plazakoan ez bezala, epaileek Sakanako udaletxeek antolatu nahi zuten erreferenduma eragotzi dute: Guardia Zibilak bailaran jarraitzea nahi zen ala ez galdetu behar zuten. Azken honek azaltzen du gainerako guztia.

ZIGOR huts gisa bakarrik uler daiteke 17 euskal errefuxiaturen aurka Frantziako Gobernuak agindutako kanporatze agindua. Edozein eratan, gizarte esparru zenbaiten aurrean, errefuxiatuen mundua arazoekin lotzea ere lortzen du. Errefuxiatuei sostengua adierazteko Baionan iragan larunbatean egindako manifestazioa horren adierazle: Baiona poliziaz hartuta eta dendetako ateak itxita, agintariek istuluak iragarri ondoren. Baionako manifestazioan, halaber, Juan Mari Olano AABko koordinatzailea izan zen, bere laugarrengo agerpen publikoan; atxiloketa agindua oraingoan gauzatu zitekeela zabaldu izan zen eta Frantziako prentsaren zenbait gunetan hasiak dira hortaz hitz egiten.

ESPAINIAKO Ingurumen Ministerioa Itoizko urtegiaren azterketa geologikoa egiten ari da eta azterketaren oinarri gisa Arturo Rebollo teknikariak egindako txosten kritiko eta entzutetsua erabiltzen ari da. Duela hilabete batzuk, ordea, Nafarroako agintariek eta Itoizko urtegia eraikitzen ari den enpresako arduradunek ironiaz eta mesprezuz arbuiatu zuten orain erabiltzen ari den Rebolloren azterketa.