Makineria burrunbaka eta piezak koipeztaturik; dena prest dago Hego Europako antzerki feria goraipatuenari hasiera emateko. «Comediants» taldeak antzerki jaialdia 1981an sortu zuenez geroztik, arte eszenikoen topagune garrantzitsu bilakatu da Tarregakoa. Antolaketa txukunaz landa, publikoaren berotasunak ere Europa osoko programatzaile eta artistak Bartzelonatik 100 kilometrora dagoen herri txiki honetara bultzarazten ditu, urtez urte antzerki garaikidearen erakusleiho txundigarria bihurtuz.
Jaialdiaren ardatz nagusia emanaldi oparoak ditugu, hogeita hiru agertokitan ehundik gora talde eta berrehundik gora ikuskizun izango baitira. Egitarauak, berrikuntza eta hedatze artistikoa bermatzea helburu duelarik, antzerkiaren itxura garaikidea eta bisuala azpimarratu nahi du, beti ere hizkuntzaren mugarik ez duen kokagune geografiko batean. Luze joko liguke talde guztien eskaintza anitza aipatzeak. Dena den, esan dezagun Frantziako Des Quidams eta Inkognito taldeek zabalduko dutela azoka erraldoia, «Rêve d' Herbert» ikuskizun poetikoaren bidez. Aurten koprodukzioa ere berariaz sustatu nahi izan dute lau emankizun apailatuta: dantzazkoak Lanonima Imperialaren «Transfiguracions» eta Iliacan Danzaren «Tirana Bohemia», gehi Paco Zarzosoren «Ultramarinos» antzezlana. La fura dels Bausen «Furamòbil» lan gotorra egunero karrikaratuko dute.
Bestalde, La llotja izeneko gunean ikuskizunaren Europar azoka eratu dute, non programatzaile, ordezkari eta artistei bitarteko guztiak eskaintzen zaizkien informazioa bildu eta harremanetan jarri daitezen. Bertan, konpainien postuak izango dira haien material grafikoa eta ikus-entzunezkoa erakusgai dutela. Beste txoko batean, bisitarien egonaldia atseginagoa egiten duten hainbat zerbitzu dago, esaterako: profesionalen harrera gunea, gonbidapenak jasotzeko mahaia, ostatua errazteko bulegoa, taberna eta abar.
Halaber, sortzaile, ekoizle, banatzaile eta protagonisten arteko dialogoa eta informazio trukaketa bizkortarazi nahian, jardunaldi teknikoak izango dira, hedatze artistikoaren alorrean eztabaida eta esperientzia berritzaileak plazaratuz, bereziki Europako eskualdeen arteko kooperazio kulturala hobetzearren. Tarregako jaialdia haatik, ez da hiru egunotara mugatzen, urtean zehar arte eszenikoen aldeko jarduera tinkoa aurrera eramaten baitu, nazioarte mailan egitura industriala garatzeko bidean. Hala nola: konpainiei buruzko informazioa erraztu, solasaldi forumak bultzatu, sareen sortze eta garatzeko bitartekoak eskaini, Europa eta Amerikako jaialdiekin egiten diren trukaketa artistikoetan parte hartu, ikuskizunen koprodukzioan sartu, liburuak argitaratu eta erakusketa nahiz aurkezpenak antolatu