"Aurten baieztaturik gelditu da 2021eko edizioak erakutsi zuen potentziala, orduko maila doi bat gorago ekarriz eta marka sinesgarri bat finkatuz euskarazko kulturaren panoraman". Hori da Ziburuko Azokaren antolatzaile diren Baltsan elkarteak eta ARGIAk azken azokaz egindako balorazioan ateratako ondorioa. Hirugarren azoka izan da ekainaren 4an egin berri dena, eta urtez urte zenbakiak hobetuz joan direnez, hainbat herritar eta argitaletxerentzat urteroko hitzordua bihurtu dela adierazi dute. Zenbakietatik hitz eginez:

Aurtengoan 33 argitaletxek erakutsi dituzte beren lanak (iaz 23 izan ziren, lehen urtean 16); 1.000 bisitari inguru zenbatu ditu antolakuntzak (iaz 700 inguru); eta salmentari begira, argitaletxeek helarazitako datuen arabera denen artean gutxienez 684 liburu (iaz 400 inguru) saldu dituzte, 100 bat disko eta 65 kamiseta, zaku edo beste.

Baltsan eta ARGIAren arteko elkarlana indartua eta gozamen kolektibo partekatua

Dena ez baita zenbakitan neurtzen, azokaren antolatzaile Baltsanek eta ARGIAk pozik adierazi dute haien arteko elkarlana sendotu egin dela hirugarren azoka honetan. Eta eskerrak eman dizkiete bidelagun izan dituzten Euskal Kultur Erakundea, Euskal Irratiak eta Ziburuko Herriko Etxeari beren laguntza tekniko, ekonomiko eta mediatikoagatik.

Aurten ere, parte-hartzaileen aurpegian poza eta gozamena marraztu direla nabarmendu dute: "Egun osoa naturalki euskaraz elkarrekin partekatzeko plazera, euskarazko kulturaren adierazpideen aniztasunaz eta aberastasunaz (liburu, komiki, disko, kantu, antzerki, bertso, umorezko saio...) gozatzeko poza, autore eta sortzaileekin hurbiltasunez aritzeko atsegina, ezagun nahiz ezezagunekin topatzeko gozotasuna, euskara erabiliz etengabe, euskaraz lasai biziz eta garena izateaz pozik".

Baina zera gehitu dute: "Gaurko irribarreek ez dituzte ahantziak atzoko bihozminak, lekuko Ziburuko Azokan omendua izan den Janbattitt Dirassarren hitzak: 'Behar da oroitarazi nondik ibiliak garen, nondik ibilarazi gintuzten. Euskara arrunt debekatua baitzen eskolan ; hitz bakarra erraiten bagenuen euskaraz, zigortuak ginen'. Ez dugu ez ahazten aitzineko belaunaldiak pairatu duena, baina ez dute lortu euskara desager araztea. Deus ez dugu irabazia baina burua altxatzen ari gara berriz, gure hizkuntz eskubideen errespetua eskatuz eta, larunbateko Azokan bezala, eskubide hauek gauzatuz plaza eta karriketan". (Beheko bideoan dago ikusgai osorik Dirassarren hitzartzea).

Hurrengo azoka ekainaren 3an

Dagoeneko urteroko hitzordu bilakaturik, Euskal Liburu eta Diskoen Ziburuko Azokak ekaineko lehen larunbatak markatuko ditu gorriz egutegietan. Horregatik, hurrengoa 2023ko ekainaren 3an izango da. Plazer duenak, egun horretan du hitzordua Euskararen errepublika ziburutarraren plazan.