Urtarrilean aurkeztu zuten Zartada Gazte Ekimena. Unai Ribera ekimeneko kideak Berriari adierazi dionez,Euskal Herriko gazte mugimendua saretzeko hainbat mugimendu elkartu ziren, eta hortik sortu da ekimena. Hasiera batean Gazte Komunistak, Ernai, Egin Klak, Ikama, Gu Ere Bagara Bilbo, Eragin, Donostiako Zizta eta Euskal Herriko Neska* Gazteak eragileetako kideak elkartu ziren, baina beste hainbat herritako eragileak ere batzen joan dira.

“Bat egitetik hamaika egitera” leloa hartu dute topaketek, eta hainbat jarduera prestatu dituzte. Ostiralean 18:00etan hasiko da ekimena, eta hainbat hausnarketa gai izango dituzte: gazte mugimendua, gazte problematikak, euskalgintza, sorkuntza eta hezkuntza, besteak beste. Hitzaldiez, mahai-inguruez eta tailerrez gain mobilizazioak, formaziorako saioak eta kontzertuak ere antolatu dituzte.