Arabako Zaballa espetxeko mintzategietako batzuk asteak daramatzate matxuratuta, Presoen aldeko APEL eta Salhaketa-Araba elkarteek jakinarazi dutenez. Presoek senide eta lagunekin –kristala tarteko eta telefono bidez– komunikazioak egin ditzaten dauden hamabost mintzategietatik bi soilik zeuden funtzionamenduan iragan astean; abokatuekin komunikatzeko dauden "zazpi edo zortzi" mintzategietatik, bakarra. Mintzategiak hondatuta egoteak, “komunikazioa are gehiago zailtzen du edo guztiz ezinezko egin”, azaldu dute elkarteek. Zaballako zuzendaritzaren arduragabekeria salatu dute, “izan ere, ez dute ezer egin egoerari konponbidea jartzeko”.

Deiak egiteko kanpaina

Salhaketak eta APELek Zaballara deitzeko kanpaina bat abiatu dute. Herritarrei eskatu diete zuzendaritzara eta zentralitara deitzeko goizeko 09:00ak eta eguerdiko 14:00ak artean, galdetuz zein diren mintzategiak ez konpontzearen arrazoiak, konpondu ditzatela exijituz, eta presoei elkartasuna adieraziz. “Mintzategi bidezko komunikazioak erabat berrezarri direla jakiten dugun arte” mantenduko dute kanpaina.