Hamazazpi urteren ondoren, Feministaldiak aldaketa izango du aurten, Plazandreok plataforma politikoak antolaketaren ardura beste elkarte bati pasatu baitio: “Funtsezko erreferentzia bihurtu da feminismoaren barruan, eta halako entitatea lortu du, non esklusiboki horretan arituko den elkarte bat behar duela”, jakinarazi du Juana Aranguren Plazandreok-eko kideak, asteleheneko aurkezpenean. Azala Arabako espazioaren baitan egindako topaketetan adostu dituzte XVII. Feministaldiko nondik norakoak, “ariketa kolektibo batean”.

Dena den, oinarria ez da aldatu: “Feministaldiak kultura feministaren erreferente izaten jarraitu nahi du”, berretsi dute bultzatzaileek. Halaber, azken zortzi aldietan bezala, Donostiako Tabakalera izango da topaleku asteazken honetatik larunbatera. Denetariko hitzaldi, performance, mahai-inguru, ibilaldi eta abarretan parte hartzeko aukera izango da, dohainik edukiera bete arte. Streaming bidez ere jarraitu ahalko dira ekitaldi batzuk, feministaldia.eus eta tabakalera.eus atarietan. 25 artista, aktibista eta pentsalarik osatuko dute lau eguneko kultur jaialdia.

Narrastiak goraipatu

Ahoa narras leloa hautatu dute edizio honetarako, eta azaldu dutenez, Ahuntzaren Eztula diseinatzaile eta tatuatzaileak “ezin hobeto” jaso du lemaren esentzia jaialdiaren irudi grafikoan. Bertikaltasuna baztertu eta gorputza lurrera eraman nahi izan dute, feminismoetan pil-pilean dauden gaiak jorratzeko. Pertsona narrastiak dira protagonista Feministaldian, bidean eraldatzen direnak: “Arrastaka doazenek, kanporatuek, zikinek, urdangek uzten duten arrastoa ikusarazi nahi dugu”, nabarmendu dute.

Jarraian egitarau osoa: