ARGIA.eus

2022ko urtarrilaren 25a

Txillardegiren heriotzaren hamargarren urteurrena oroitzeko programa aurkeztu dute

  • Urtarrilaren 14an hamar urte beteko dira Jose Luis Alvarez Enparantza Txillardegi hil zela. Omenaldi gisa zenbait ekimen prestatu dituzte datorren urtarrilerako, "Txillardegiri zor zaion aitortza publikoa aldarrikatuz eta izenik ez duen Donostiako Udal Liburutegi zentralari bere izena jar diezaioten eskatuz". Mahai inguru bat, Txillardegik idatzi zituen kroniken liburuaren eta berari buruzko bi libururen aurkezpena eta Antiguan omenaldia prestatu dituzte, besteren artean.

ARGIA @argia
2021eko abenduaren 20a
Txillardegi hil zela hamar urte beteko dira. (Argazkia: Dani Blanco)

Urtarrilaren 11n, 13an, 15ean eta 18an izango dira Txillardegiren omenezko ekimenak eta guztietan osasun neurriak hartuko dituzte.

Urtarrilaren 11n, asteartez, 19:00etan San Telmo Museoan, “Txillardegiren hizkuntza politikaren oinarriak eta gaurkotasuna” mahai ingurua egingo dute Araitz Aizpuru eta Iñigo Urrutiak, Telesforo Monzon Fundazioko Txillardegi Gogoeta Guneak (TMelab) antolatuta.

Urtarrilaren 13an, ostegunez, 19:00etan San Telmo Museoan, “Kronika" liburua aurkeztuko dute Koldo Izagirre, Garbiñe Ubeda, Juan Luis Zabala eta Gorka Bereziartuak. Susa argitaletxea eta ARGIAk antolatua izango da.

Urtarrilaren 15ean, larunbatez, eguerdiko 12:00etan, Antiguako bere horma irudiaren aurrean, omenaldi ekitaldia egingo diote. Lehenik eta behin, horma irudi berritua inauguratuko dute eta ondoren, euskal idazle baten esku hartzeaz gain, txilar landareak landatuko dituzte. Bertan izango dira txalapartariak, Beñat eta Unai Gaztelumendi bertsolariak, Janitz Enparantza txistularia eta Sua Enparantza eta Natale Bueno dantzariak, antolatzaileek jakinarazi dutenez. Ekimena Euskal Herrian Euskaraz kanta abestuz eta muxiko bat dantzatuz amaituko dute. “Txillardegi Udal Liburutegia” herri ekimenak antolatuko du.

Urtarrilaren 18an asteartez, 19:00etan San Telmo Museoan, Jakin fundazioak prestaturiko Txillardegiri buruzko bi liburu berri aurkeztuko dituzte: “Txillardegi: Euskalgintza” eta “Txillardegi: intelektuala eta gizartea”, Alaitz Aizpuru, Lorea Agirre eta Igone Lamarainen eskutik.

2022ko udaberrian, Telesforo Monzon Fundazioaren egoitza den Bergarako Olaso Dorrean, Txillardegiri buruzko erakusketa zabalduko dute eta Euskal Herrian Euskaraz (EHE) taldeak mintegi berezia antolatuko duela iragarri du. Azkenik, hurrengo Korrikaren edizioa Donostian bukatuko denez, “Txillardegi Udal Liburutegia Herri Ekimena” taldeak ekimen berezia prestatuko du “Txillardegi Udal Liburutegia”-ren aldeko aldarrikapenak presentzia izan dezan.

Hamar urtez babesa handitzen

Txillardegi Udal Liburutegia ekimeneko kideek, prentsara igorritako oharrean nabarmendu dute azken urteetan pixkana-pixkana badoala aldarrikapen honen aldeko babesa zabaltzen, eta hamargarren urteurrena izenik ez duen Donostiako liburutegi nagusia birbataiatzeko une egoki gisa jo dute.

Aurten ere, elkartearen lana finantzatzeko laguntza eskatu dute eta kontu korronte bat (ES31-3035 0075 47 0750058627 Laboral Kutxa) eta Bizum zenbaki bat publiko egin dituzte (Joseba Alvarez, 696755741)

 

Kanal hauetan artxibatua: Txillardegi  |  Politika  |  Donostia

Txillardegi kanaletik interesatuko zaizu...
2022-01-23 | Xalba Ramirez
Erbestea ez da turismoa, baina behar du kronika

Jose Luis Alvarez Txillardegi hil zela hamar urte bete dira. Efemerideek ematen dute aitzakia biltzeko, eta ekimenak sortzeko. Donostiar euskaltzale eta ekintzailearen gogoa omentzeko, zer hoberik liburuak baino. Zelulosa eta tinta ekarpen erraldoia utzi baitzuen atzean.

[+]

2022-01-17 | Irutxuloko Hitza
Txillardegi gogoratu dute, haren heriotzaren hamargarren urtemugan

Txillardegiren heriotzaren 10. urteurrena izan da gaur, eta ohi bezala, haren omenezko ekitaldia egin dute Txillardegi plazan (Gaskonia) Txillardegi Udal Liburutegia herri ekimeneko kideek. 2018an inauguratu zen horma-irudia berritu du Mikel Herrero Sesmak. Material hobea... [+]


Mundua Txillardegiren begien bitartez

Ostegun honetan aurkeztuko dute Jose Luis Alvarez Txillardegi-k prentsan argitaratutako kronikak biltzen dituen liburua. Donostiako idazle eta pentsalaria hil zenetik hamar urte bete dira aurten eta efemeridearekin bat eginez, haren ibilbidea hobeto ezagutzeko bidea izango da... [+]


Irakurrienak
Azken albisteak
Argia buletina
Egunaren laburpena
zure e-postan
Eguneraketa berriak daude