Lehenengoaren inguruan zalantza ugari dago, baita Trumpen ingurukoen artean ere, CNN telebista kateko iturriek jakinarazi dutenez. Rudy Giuliani New Yorkeko alkate ohi eta aholkularia buru duen  talde legalak kontaketa-aretoetan behatzaile errepublikanoei sartzea galarazi dieten kasu zehatzak dituela dio, baina kontrako aldean, kaltetutako estatuetako agintariek –haietako batzuk errepublikanoak–, adierazpen horiek gezurtatu dituzte eta legeen alorrean trumpistek planteatutako lehenbiziko batailek ez dute eragin handirik izan.

Estatu bakoitzeko behin betiko emaitzak abenduaren 8a baino lehen egon behar du baieztatuta, balizko helegite eta auzi guztiak ebatzita. Baina kontuan izan behar da AEBetan hautesleek ez diotela zuzenean presidenteari botoa ematen, Hauteskunde Elkargoan euren estatua ordezkatuko duten pertsonei baizik eta, hori dela eta, ezinbestekoa dela egun horretarako argi egotea nortzuk diren ordezkari horiek.

Hauteskunde Elkargoa abenduaren 14an bildu behar da estatu bakoitzeko ordezkariek euren botoak eman ditzaten, eta urtarrilaren 6an AEBetako Kongresuko bi ganberen saio batean zenbatuko dira. Mike Pence presidenteordeak emango du presidentearen berri Senatuko presidente gisa, eta agintaldia urtarrilaren 20an hasiko da.

Trumpen jokabideak baldintzatuko du bitarte horretan gerta daitekeen guztia. "Datozen bi hilabeteetan azken lau urteetan baino gauza gehiago ikusiko ditugu", adierazi du Miles Taylor aholkulari ohiak Washington Post egunkarian.

Gobernu-taldeko kideen artean "purga" berri baten zurrumurru etengabeez gain, litekeena da Trumpek bere eskumenak erabiltzea indultuak emateko edo etorkizuneko edozein ikerketaren aurrean bere buruari immunitatea emateko. Presidentea ikertzen aritu den Andrew Weissmann fiskal ohiak Washington Post-i adierazitakoaren arabera, baliteke Trumpek kargua utzi arteko tarte hau baliatzea bere burua, ingurukoak eta bere negozioak legez babesteko.

Azkenik, kontratazio publikoen bidez hurrengo administrazioa baldintzatzeko neurriak ere har ditzake Trumpek datozen bi hilabeteetan, beste alderdi bateko presidentea bulegoan sartzen denean potentzialki haren kontra egin dezaketen langile publikoz inguratuta egon dadin. Gauzak honela, Joe Biden presidente hautetsiaren taldeak ez du inolako laguntzarik espero trantsizio ordenatu bat egiteko.