Josep Lluis Trapero Esquadra Mossoen burua da berriz ere, Kataluniako Barne Sailak ostegun honetan jakitera eman duenez. Horrela, Traperok Mossoen ardura bereganatuko du, urriaren 20an Espainiako Auzitegi Nazionalak sedizio eta desobedientzia delituetatik absolbitu ostean.

Trapero kargutik kendu zuten 2017an, Espainiako Gobernuak 155. artikulua aplikatu ostean. Orduz geroztik, lege-prozeduretan nahastuta egon da, eta zigor larriak egotzi dizkiote prozesu independentistarekin kolaboratzea leporatuta. Espainiako Justiziak atzera bota ditu akusazio horiek eta Ministerio Publikoak ez du apelaziorik aurkeztu.

Mossoen zuzendari nagusi ohi Pere Solerrek, bera ere Auzitegi Nazionalak absolbitutakoa, Traperoren itzulera ospatu du: "Batzuetan, bidegabekeriak konpontzeko, beste batzuk egin behar ditugu". Generalitateko hainbat kide ere pozik azaldu dira erabakiaren aurrean. Pere Aragones jarduneko president-ak Traperoren profesionaltasuna eta zorroztasuna azpimarratu ditu, eta polizien ardura berriz ematea "justizia eta erreparazio ekintza" dela esan du.

Generalitateak prozesu independentistan hartutako ildoaren kontra mintzo izan da Mossoen buruzagi berria, epaiketetan adierazitakoen arabera. Traperok adierazi zuen mossoak ez zeudela Carles Puigdemonten exekutiboaren tesi independentistarekin lerrokatuta, erreferenduma eragozteko Mossoek epaiak bete nahi zituztela eta ez zutela independentzia aldarrikapena babesten, besteak beste. Epaileak hala agindu izan balu, Puigdemont atxilotzeko Mossoek prest zuten plan baten berri ere eman zuen Traperok Auzitegi Nazionalean.