Sustrai Colina, Sari Nagusia: Kantuz galderak, airean sentitzen ziren erantzunak

Bertsotan egin du saritu nagusiak bere hitzaldia. Bere buruari egingo lizkiokeen galderak jaulkiz (zorrotzak, Colinarenak ohi direnez). Aiurrik grabaturiko bideoan ikusentzun ditzakegu:

Epaimahaiaren hitzetan, "irakurlea erakartzea lortzen du hasieratik. Trebea da hizkuntzarekin jolasten. Eta aurrelan handia nabari da elkarrizketa hauetan".

Amagoia Gurrutxaga, Sari Berezia: "Irakurleak dira gure benetako sostengu"

Amagoia Gurrutxagak eskertu ditu sari horren prozesuan parte hartu duten denak. Tartean, ama, "eskolara joan aurretik irakurtzen irakasteagatik" eta aita "txiste, esaera... kontatzeko modu bereziak deskubritzeagatik"; "ez ditugu gauza berak irakurtzen, ezta beharrik ere. Baina neure kontaketa egiteko zumeak eman zenizkidaten". Berriari ere eskertu dio, idazten bertan ikasi izana eta Jakineko Lorea Agirreri, elkarrizketa egitea eskaintzeagatik eta elkarrizketa egiten laguntzeagatik. Kristiane Etxaluz ezagutzen oraintxe hasi dela aitortu du, hainbeste egindako eta bizitakoa ezin dela elkarrizketa bakarrean kabitu. Haren ekarpena nabarmendu dute bai Gurrutxagak, bai epaimahaiak.

Euskarazko komunikabideen estrategikotasunaz mintzatu da azkenik: "Irakurleak, zuek zarete kazetarien lanerako benetako bultzada. Gainerako arloekin alderatuta jartzen diren indarrak ikusita, ez daukat hain argi erakunde publikoek garbi duten euskarazko komunikabideen estrategikotasuna".

Epaimahaiak azpimarratu du elkarrizketa-biografia hau sakona baina irakurterraza dela, eta "bizi-gogoa transmititzen duela". Baita euskararen aldaerari eutsi izanak ematen duen hurbiltasuna.

Unai Oiartzun, Kazetari Berria: "Inguru erdaldunetan euskaraz aritzen diren kazetariak ekarri nahi ditut gogora"

Unai Oiartzunek eskertu zuen, sari hau "bultzada handia dela hasi berriontzat". Irunero eta Antxeta Irratiko lankideak ere eskertu zituen. Jarraian, bi aipamen egin zituen: "tokiko komunikabideetako lana saritu izanari balio handia ematen diot. Sarri baldintza txarretan aritzen gara, baina beharrezko da lan hau". Eta bereziki, "inguru erdaldunetan euskaraz aritzen diren kazetariak" ekarri zituen gogora: "Besarkada handi bat haientzat denentzat".

Rikardo Arregi gogoratuz, euskara indartzen egin dena eta egiteko dagoena

Ana Karrere Andoaingo alkateak aipatu zuen teknologia berrien eskutik, hedabide motak gehitzen doazela eta jarraituko dutela. Eta "hauetan euskara lehentasun izatea ezinbestekoa da. Hizkuntzak bizi behar badu, hor ere bizi behar du" azpimarratu zuen.

Patxi Baztarrika Eusko Jaurlaritzako Hizkuntza Politikarako sailburuordeak gogora ekarri zuen aurten 50 urte bete direla Rikardo Arregik euskararen gaineko mintzaldi sutsua egin zuela Usurbilen, Udarregiren eskulturaren aurrean. "Berak euskarari buruz egin zuen iragarpen ezkorrak ezerezean geratu da. Har zioenez, 'martxa honetan ez da izango euskara hitz egingo duenik'. Zorionez, ez zuen asmatu. Bere iragarpena ez zen bete, besteak beste, berak eta bere belaunaldiak ekinaren ekinaz jarri zituzten oinarriei esker". 50 urte hauetan hezkuntzan eta komunikabideetan egindako lana aipatu du, eta euskararen berreskurapenean egindako lorpenak balioan jarri ditu. "Egungo kezka nagusia ez da biziraupena, baizik, bizi indarra, hizkuntza bizia izatea. Asko egin dugu baina asko dugu egiteko. Baina ausardia bada ere, esango nuke Rikardo Arregi bera asko poztuko zatekeela egungo egoera ikusita, eta batez ere ikusita askoz gehiago egiteko prest gaudela, adostasunez". Horretarako komunikabide eta kazetarien lana oso garrantzitsua dela adierazi zuen, eta hauen lana txalotzen duela.

Ekitaldiari amaiera aurkezle lanetan aritu zen Garazi Kamio idazleak eman zion. Ekitaldi osoa asko jantzi zuten bere hitzek, baita amaiera ere. "Rikardo Arregi berriz gogora ekarrita, bihar dira 47 urte Andoainen haren hil kanpaiak entzun zirela. Gaur saritu diren ARGIA eta Jakinen utzi zuen sinadura, beraz, gurpilak aurrera darrai. Baina duda egiten dut Andoaini begira kezkarik ez ote lukeen izango, bertako euskararen erabileraren putzu sakonaren aurrean. Erabilera %18 soilik dela ikusita. Zer esango luke? Esan ez dakit, baina seguruena esan baino egin egingo luke". Andoainen ekiteko gogo horri eutsita, irailaren 24an Andoain Euskaraz eguna ospatuko dutela iragarriz amaitu zuen sari banaketa, hurrengo urtera arte agurtuz.