Erasoa bideoan grabatuta geratu da: supermerkatu bateko aparkalekuan, lur azpian, buruan ukabilkadak jotzen dizkiote bi agentek lurrean dagoen biktimari. Torturaren aurretik modu pasiboan igarotzen diren pertsona batzuk ere ikusten dira bideoan, baita behin konorterik gabe dagoen Silveira Freitasi erreanimazioa nola egiten dioten ere.

Supermerkatuko langile batekin izandako eztabaida jotzen da hilketaren jatorrian, IPS berri agentzian irakur daitekeenez. Carrefour enpresak "ekintza kriminala" deitoratu du, eta zerbitzua ematen zion segurtasun enpresarekin zuen kontratua hautsi eta merkataritza unitateko zuzendaria kaleratuko duela adierazi du.

Brasilgo presidenteorde Hamilton Mourãoren hitzetan, "tamalgarria" da gertatu dena, baina bere hitzetan "Brasilen ez dago arrazakeriarik". Herritarrak askok AEBetako George Floyden kasuarekin lotu dute gertatutakoa berehala. Berria egunkarian igandean argitaratutako erreportajean Arantxa Elizegik ere bide horretatik jarri zion izenburua erreportajeari paperean: Brasilgo George Floyd.

Presidenteordea honela deskribatu du nazioarteko IPSk: "Mourão antiheroi tragiko moduko bat bezala da, indigena gisa aitortzen baitu bere burua, aita Amazoniako lurraldean jaioa izaki. Armadako jeneral izan zen, aitaren karrera jarraituz eta hori Brasilen arrazakeriarik ez dagoela baieztatzeko argudio gisa erabiltzen du. Baina bere begirada arrazista agerian geratu zen 2018ko abuztuan egin zuen hitzaldi batean, azpigarapen brasildarra bere osaera etnikoari egotzi baitzion, Indigenaren alferkeria eta gisako estereotipoak hauspotuz".

Brasilen AEBetan baino sei aldiz herritar beltz gehiago hiltzen ditu poliziak urtean. 212 milioi biztanle dituen Brasilen, herritarren %56a afrikarren-ondorengoa da, eta %1 baino gutxiago herritar indigenak. Hala ere, botere guneak gutxiengo zuriaren eskuetan pilatzen dira.

Freitas biktimaren aitak baieztatu duenez, "arrazakeria" izan zen, eta erasoaren indarkeriak egiaztatu egiten du hori. Ez zen inongo lapurreta-salaketarik izan, bere semea langilea zela eta ateak soldatzeko enpresa batean lan egiten zuela adierazi du.

Hilketa hori Brasilgo arrazakeria agerian uzten duten kasu ugarietako bat baino ez da IPSren arabera. 2019ko otsailean, 19 urteko herritar beltz bat hil zuen Rio de Janeiroko Extra supermerkatu sareko segurtasun agente batek itota.

Protesta gogorrak supermerkatuetan

Tragedia hori azaroaren 20aren bezperan gertatu zen, Kontzientzia Beltzaren Eguna. Zumbi dos Palmares heroi beltz hil zen eguna. XVII. mendean ihes egindako esklaboak babesten ziren Brasilgo quilombo handiena antolatu izana aitortzen diote pertsona honi.

Horregatik, Freitasen hilketak karga sinboliko handia irabazi du. Hilketa gertatu zen Carrefour-en istiluak izan dira egunotan eta beste hainbat supermerkatutan ere suak piztu dituzte manifestariek. Manifestazio baketsuak ere izan dira hiri askotan, azpiko bideoan ikus daitekeenez.