Astearte goizean egin du aurkezpen agerraldia Sukar Horia taldeak. Hasieratik zehaztu dute beren helburua: krisi ekologikoa eta klima larrialdia lantzea, ikuspegi globaletik. Aurreratu dutenez, “krisi ekologikoaren inguruko kontzeintzia zabaltzea” eta “alternatibak proposatzea” bilatzen dute.

Lur planetak bizi duen egoera larriaz arduratuta agertu dira: “Mundu osoko zientzialari eta adituek gero eta agerikoagoa dena berresten dute: Lur planetako baliabideak agortzen ari dira, eta gizakion interbentzioaren ondorioz klima inoiz baino arinago aldatzen ari da, datozen hamarkadetan bizitzaren erreprodukzioa, orain arte ezagutu dugun moduan behintzat, arriskuan jarriz”. Egoera horren aurrean elite politiko eta ekonomikoak Madrilen antolatutako goi bileran agertutako “arduragabekeria” gaitzetsi dute.

Testuingurua hori izanik, prentsaurrekoa egiteko tokia estrategikoki aukeratu dute: “Euskal Herriko enpresa kutsatzaileena den eta EAEko CO2 isurien %11ren erantzulea den Petronor”. Hala bada, aurkezpen hutsetik harago, salaketa egiteko ere baliatu dute agerraldia, eta exijentziei ere eskaini diete tartea: “Eusko Jaurlaritzak darabilen hitz ponpoxoetatik haratago, politika publiko zehatz eta eraginkorrak martxan jartzea beharrezkoa dela deritzogu, jendartearen mobilizazioa aktibatuz eta instituzio ezberdinei presioa eginez, justizia sozialean oinarritutako trantsizio ekologiko baten alde”.

Grebara deia

Borrokarako grina eta bizipoza aldarrikatu ditu elkarte sortu berriak, eta nabarmen da batetik zein bestetik osasuntsu dabiltzala. Izan ere, ezagutzera ematearekin bat batu dira urtarrilaren 30eko grebara, “ingurumena eta bizitza erdigunean jarriko dituen gizarte eredu baterantz aurrerapausoa izango delakoan”.