Senpereko urbanizazio plana moldatzearen kontra, sinadurak

  • Urbanizazio plana moldatzeko xedea iaz bozkatu zen elkargoan. Oraino inkesta publikoa egitekoa bada ere, Ibarrun auzoko bi profesionalek kontrako petizioa abiatu dute.

Artikulu hau egilearen baimenari esker ekarri dugu.

2020ko maiatzaren 17an - 11:28
Hazitik Lilia elkarteko kideak. Argazkia: France Blue

Hazitik Lilia barazkiak ekoizten dituen etxaldeak eta Goietxea kanpinak abiatu dute sinadura bilketa, biak kezkatuak baitira beren aktibitateak paira litzakeen ondorioez, Senpereko urbanizazio planaren moldaketa xedea gauzatzen balitz. Lurralde antolaketa eta programazio orientazioak (OAP frantsesezko sigletan) bi enpresak inguratzen dituzten 8,2 hektareako lurretan etxebizitzak eraikitzea du xede.

2028ra begira jarri da herria bere urbanizazio planaren moldaketak egiteko, eta epe horretara egin proiekzioetan 1.280 biztanle gehiago lituzke Senperek. Horien aterpetzeko, elkargoak argitaratu txosten baten arabera, 686 etxebizitza berri beharrezkoak lirateke. Plan berriak, ondorioz, etxebizitza berrien eraikuntzarako lurrak libratuko lituzke; xedearen baitan, oraingoz laborantzakoak diren Ibarrun auzoko lurrak eraikuntzara pasatuko lirateke, 162 etxebizitza eraikitzeko (74 etxebizitza indibidual eta 88 kolektibo) ondoko urteetan.

2003az geroztik, Mirentxu Doihenartek lur horien ondoko negutegietan lan egiten du senarrarekin, eta berak abiatu du xedearen kontrako sinadura bilketa: “Etxez inguraturik, gure geroa oso kezkagarria ikusten dugu”. Kezkaren arrazoi desberdinak zerrendatu ditu: alde batetik, beren ekoizpenerako erabiltzen dituzten tresna desberdinen harrabotsak, edo bezeroen joan-jinek eragin harrabotsak balizko biztanle berrien “salaketez” beldur dira. Horrez gain, inguruko lurrak eraikuntzara bideratzea jenagarria zaio, “garapenaren aldetik ez baita gehiago aukerarik izaten ahal”. Ekoizten dituzten hazientzat ere arriskua dela uste du; Euskal Herriko landare zaharren haziak gordetzen dituzte urte batetik bestera berriz ereiteko, tomate, kuia edo piperretan adibidez. Baina etxebizitza berriekin batean baratzeez inguratuak izanen liratekeela argi du, eta hazi mota horientzat behar dute “segurtatu ez direla kanpoko beste mota batzuekin kutsatzen eta beraz gurutzatzen. Behar da garbitasuna atxiki eta hori ez genuke gehiago egiten ahalko”.

Goietxea kanpineko kudeatzaileetarik bat, Pascale Mazet, larritasunez mintzo da: “Etxebizitzen eraikuntzaren hastapenetik, kanpinak bost urte iraunen ditu gehienik, porrot ekonomikora iristeko”. Haren erranetan, begi bistakoa da hainbeste etxebizitzaren eraikuntzak uda batez baino gehiagoz lanak ekarriko dituela, eta obretako harrabotsak “ez dira bateragarriak kanpineko bezeroek nahi duten lasaitasunarekin”. Gainera, etxebizitzak egin ondoan ere etxaldearen arazo berdintsuak aipatzen ditu elkarbizitzarako: bai etxebizitzetako harrabotsak, bai egunean zehar kanpineko igerilekuan haurrek egiten dutena edo kanpinaren mantenu lanetarako baliatzen diren tresnena ere. Trabak alde guztietatik, beraz.

Inkesta publikorantz

Urbanizazio planaren moldaketa horren aitzin-xedea herriko etxean eta Euskal Elkargoan onartua izan zenetik, 2019ko abenduan, dosierrak aitzina segitzen du. Konfinamendu garaian egitekoa zen pertsona publiko elkartuen kontsulta (Laborantza Ganbera edo estatua, besteak beste), erran gabe doa, gibelatua izan da zenbait hilabetez; ondotik, inkesta publikoa eginen da, eta, azkenik, moldaketekin ala gabe (aldaketa gehiago proposatzen dira Senpereko beste auzoetan ere) bozkatuko da. Sinadura bilketak auzoko bi enpresen iritzia azkartzea du xede, aitzinetik ere Pierre-Marie Nousbaum Senpereko auzapezak eta Jean Rene Etxegarai Euskal Elkargoko presidenteak ukan baitute horren berri.

Beste kezka batek elkartzen ditu, horrez gain, Hazitik Lilia eta Goietxea: inguruetako lurrak eraikuntzarako bideratzeak ez diela ahalbidetzen beren eremua handitzea, eta, ondorioz, “lan tresnaren transmisiorako traba bat” balukete, Mazeten erranetan. Horregatik, petizioaren aurkezpenean proposamenak ere egiten dituzte, hala nola inguruetako lurrak laborantzarako sailkapenean atxikitzea.

 

 

 

 

"Pierre-Marie Nousbaum, Senpereko auzapeza".

 

 

 

“Petizioa doi bat berant heldu da urbanizazio planaren negoziazioarekiko”

“Herriko urbanizazio planaren zati hori herriko kontseiluan bozkatua izan zen joan den azaroan, eta herri elkargoko kontseiluan abenduan. Dosier hori ikerketa publiko baten eskuetan da orain, eta inkesta publikoaren emaitzak itxaroten ditugu. Petizioa orain egiten dute, baina joan den abendutik ez da berrikuntzarik izan; doi bat berant heldu da urbanizazio plan horren moldaketaren negoziazioarekiko. Bozka horien segida logikoa da orain gertatzen ari dena, inkesta publikoarena alegia, konfinamenduak gibelatu duena”.


Kanal honetatik interesatuko zaizu: Hirigintza
2024-02-29 | Estitxu Eizagirre
Nola elikatu hiriak?
Hiriko parkeetan zergatik ez fruta arbolak eta barazkiak landu zuzenean biztanleentzat?

Hiriak nola elikatu? Horra Egonarria saioan Eli Pagolak Audrey Hoc laborariari luzatu dion galdera. Hoc-ek, bere lagun Aimar Rodriguezekin batera, fruitu arbolak ekoizten ditu, Etxalarren baso jangarria dauka eta Biriatuko udalarekin elikadura burujabetzaren estrategia martxan... [+]


Frankismoak errepresialatutako emakumeen izenez jantziko dira Txantreako karrikak

Hiru urteko lanaren emaitza jaso du Iruñeko Udalak sinatutako dekretuak. Auzotik sortutako ekimenari esker, zazpi kale eta hiru plaza izendatuko dituzte.


Chinatown: zokoratuak eta zukutuak

Txina, 1417 urte inguruan. Zheng He almiranteak, Ming dinastiako enperadoreen soldatapeko esploratzaileak esan zuen posible zela “mundu osoa ibiltzea Txinatik irten gabe”. Ordurako Indiako Ozeanoan, Itsaso Gorrian eta Asiako hego-ekialdean zabaltzen hasia zen kolonia... [+]


2024-01-04 | ARGIA
6.486 donostiarrek ezezko botoa eman diote Basque Culinary Center Gros eta Uliako parkeetan ezartzeari

Uliako auzo elkarteak eta SOS Manteo plataformak herri galdeketa egin dute asteburuan. 6.948 lagunek hartu dute parte, eta 6.486 parkeak babestearen alde agertu dira.


2023-12-13 | Axier Lopez
Gipuzkoa konkistatu zuen Gaztelako erregearen omenezko kaleari izena aldatu dio Arrasateko Udalak herritarren eskariz

Gipuzkoa Nafarroako Erresumatik aterarazi eta Gaztelarentzat konkistatu zuen Alfonso VIII. erregearen omenezko kaleari izena aldatuko diote. Horren partez, “17 emakume" deituko da kale hori, frankismoaren lege matxisten aurka borroka egin zuten herriko emakume batzuen... [+]


Eguneraketa berriak daude