Zaballako preso baten heriotzaren gaineko ikerketaren edukia ez dio eman Arartekoari Segurtasun Sailak
Zaballako preso bat Gasteizko Ospitalean hil ondotik, heriotza argitzeko babesa eskatu zion 2020an Salhaketa-Arabak Arartekoari. Azken horrek abenduan jakinarazi die kasuaren gaineko ikerketa artxibatu egin dela, eta Segurtasun Sailak ez diola eman ikerketaren eduki guztia. Poliziaren esku-hartzearen gaineko dokumentaziorik ere ez zaio ahalbidetu.
2020ko apirilaren 6an, Zaballan preso zegoen 67 urteko G.B. Gasteizeko Santiago Ospitalera eraman zuten, ebakuntza egin ziezaioten. Ospitaleratua izan ondotik, bere jagoletzan zeuden poliziek mendean hartu zuen presoa, erizain bati aurre egin ziolako, Ertzaintzaren arabera. Ondorioz, Salhaketa-Araba elkarteak jakinarazi duenez, liskarra jazo zen ertzainen eta presoaren artean, eta poliziek emandako kolpeek lesioak eragin zizkioten preso zegoen pertsonari; hala jaso zuen Eusko Jaurlaritzaren 2020ko maiatzaren 18ko txostenak, elkarteak zehaztu duenez. Handik bi egunera, apirilaren 8an, ospitalean bertan eta ebakuntzarik egin gabe hil zen.
G.B.-ren ospitaleko egonaldiaren nondik norakoak argitu nahi izan zituen Salhaketa-Arabak, baina "Gasteizko Ospitaleko, Instrukzioko Epaitegiko eta hedabideetako isiltasunaren aurrean" informazioa ezin izan zuten kontrastatu. Arrakastarik gabe Fiskaltzaren atea jo eta EH Bildu koalizioaren bidez Estefanía Beltrán de Heredia Segurtasun sailburuari zenbait galdera egin ostean, elkarteak Manu Lezertua Arartekoarengana jo zuen, gertakariak argitzeko babes eske. "Erakunde horrek informazioa eskatu zion Eusko Jaurlaritzako Segurtasun Sailari 2020ko apirilaren 29an, eta hainbat gomendio eman zituen presoaren heriotza Poliziaren zaintzapean ikertzeko", jakinarazi dute. Alabaina, abenduan ikerketaren itxieraren berri eman zion Arartekoak elkarteari.
Kasua artxibatua zela jakinarazteko helarazitako mezuan, Arartekoak gaitzetsi egin zuen Segurtasun Sailak heriotzaren harira abiatutako ikerketaren eduki guztia eman ez izana. Informazio hori beharrezkoa da egiaztatzeko ikerketa gauzatu dela Arartekoak aholkatutako jarraibideen eta nazioarteko errekerimenduen arabera. Horrez gainera, Poliziaren esku-hartzearen gaineko dokumentaziorik ere ez zaio ahalbidetu Arartekoari, horiek eskatu arren. Hala, ezin izan du baloraziorik egin, ezta ziurtatu Arartekoaren 7/2011 Gomendio Orokorra betetzeko mekanismoak ezarri diren ere.
Arartekoak adierazi du bere intereseko auzien gaineko erantzun falta edo erantzun eskasa oztopoa direla legez dagozkion funtzioak betetzerako orduan, eta horrekin batera, Arartekoarengana jotzen duten pertsonen eskubideak serioski kaltetzen dituela.
Ildo berean, Salhaketa-Arabak salatu du Segurtasun Sailak Arartekoarenganako "jardunbide txarrak" izan dituela. Horrez gainera, ohartarazi du litekeena dela Ertzaintzaren jarduera behar bezala ez kontrolatu izana.
Espetxeetako osasun zerbitzuaren gabeziez mintzatu da Libertad Francés Lecumberri, Salhaketa Nafarroa elkarteko koordinatzailea: “Osasun arloko langileak espetxeko logikekin eta irizpideekin kutsatzen direnean, zenbait eskubideren bermatzaile izan beharrean,... [+]
Kartzeletako funtzionarioen protestak aitzakiatzat hartuta, milaka preso erabat giltzapetuta eduki dituzte Kataluniako sei espetxetan.
Iragan astean Oroitz Herrero 26 urteko irundarra hilik aurkitu zuten Arabako Zaballa espetxeko bere ziegan. Eusko Jaurlaritzaren arabera “heriotza naturala” izan zen. Gaztearen senideek ARGIAri adierazi diote, ordea, Herrerori ez diotela arreta mediku egokirik eman... [+]
Eusko Jaurlaritzak espetxeen transferentzia bere gain hartu zuenetik, duela bi urte eskas, laugarren heriotza izan da euskal kartzeletan, hirugarrena Zaballako espetxean.
Salatu du larunbatean bere burua urkatu zuen presoari ez zitzaiola suizidioen aurkako protokoloa ezarri eta ziegan bakarrik zegoela, aurreko egunetan “ondo ez zegoela” adierazi bazuen ere. Azpimarratu du Jaurlaritzak espetxeen eskumena hartu zuenetik bere buruaz... [+]