Sare herritarrak iragarritako moduan, urriaren 8an jai-giroa nagusitu da Donostian, baina euskal presoen eskubideen aldeko aldarrikapenak presente egon dira uneoro. Honelaxe laburbildu dute eguna Joseba Azkarraga eta Bego Atxa Sareko bozeramaileek manifestazio amaierako ekitaldian: “Goza dezagun gaurkoan, poztu gaitezen orain arte lortutakoarengatik, ez baita gutxi. Bihar salatzen eta aldarrikatzen jarraituko dugu”.

Espetxe politikan pausoak eman direla nabarmendu dute, eta 2020an hasitako Izan Bidea ekimena burutu dute Bulebarretik abiatuta: “Gaur, duela bi urte geure buruei ezarritako erronka bete dugu: guztion artean Euskal Herriak dituen biztanle adina kilometro osatzea”. 3.127.326 kilometro osatzeko falta zuten tartea elkarrekin eginda, Pio XII plazan jende gehiago batu da presoen aldeko manifestaziora. Egiteko dauden urratsak gogorarazi ditu Sarek, besteak beste, urruntze politika behin betiko amaitzea: “Oraindik Espainiako kartzeletan dauden 37 preso horiek hurbildu behar ditugu, bakarra urrun den heinean urruntze politikaren amaieraz ezin izango baitugu hitz egin”. Frantziako kartzeletan dauden presoak ere gogoan izan dituzte, eta Bake Bidea eta Bake Artisauak zoriondu, Esnal eta Parot 32 urteren ostean askatzeko egindako lanagatik, besteren artean.

Giza eskubideak defendatzen dituzten herritar, politikari eta eragile guztiak batuta helburuak azkarrago lortzen direla azpimarratu dute eta orain arteko borroka bateratua eredugarritzat jo. Halaber, dei egin dute presoen eskubide urraketak salatzen jarraitzera, eta hurrengo hitzordua zehaztu dute: urtarrilaren 7an Bilbon egingo dute manifestazioa.

Bide hau egiten jarraitzeko bultzada indartsua izan da gaurkoa. Milaka pertsona batu gara #EtxeraBideaGertu Bulebarretik, Pio XIIera eta Pio XIIetik Ilunbera bidean. 3.127.326km egin ditugu eta orain, hurrengo urratsa egitera goaz; URTARRILAREN 7AN BILBON ELKARTUKO GARA! pic.twitter.com/HT4AEvzr4n

— Sare #IzanBidea ?? (@sare_herritarra) October 8, 2022

Salbuespen politikak

Sarek salatu du presoei etxerako bidea oztopatzen jarraitzen dietela salbuespenezko espetxe politikek:

“Salbuespenean oinarritutako politikan ainguratuta jarraitzen dugu, eta hori are nabarmenago ikusten da Auzitegi Nazionalak, Fiskaltzak bultzatuta, Tratamendu Batzordeek euskal presoentzat onartzen dituzten gradu-progresioak edo espetxe-baimenak errekurritu eta atzera botatzen dituen bakoitzean. Mendekua oinarri soilik uler daiteke preso horiei Europan ezezagunak diren zigor luzeak bete ditzaten helburu bakarrarekin, ad hoc aplikatutako salbuespenezko legedi bati eusteak, adibidez 7/2003 eta 7/2014 Lege Organikoei”.

Euskal presoen egoera zertan den xehe azaldu zuen Xabier Letonak ARGIAko azken alean, hemen irakurgai: Sakabanaketa amaitzear, baimenen blokeoa dator.

Elkartasun jaialdia

Manifestazioa amaituta, Ilunbeko ateak ireki dituzte, eta musika nagusitu da goizeko ordu txikiak arte. Elkartasun festarekin eman dio jarraipena Sarek larunbatari, eta hasiera ekitaldian Inaxio Oiarzabal Sareko bozeramaileak ospakizunerako eta aldarrikapenerako mezu bera zabaldu du: “Eraitsi ezin ziren murruetan arrakalak zabalduz pixkanaka egoera aldatuz doa, baina bide luzea dugu oraindik ere aurretik, gaur ospatu dezagun eta bihar goazen berriz ere lanera”.

Musika talde ezagunek girotu dute Ilunbe, eta leporaino bete dute plaza. Eñaut Elorrieta, Belako, Su Ta Gar, Liher, Hertzainakeko Josu eta Gari, Zea Mays, Esne Beltza, Doctor Deseo eta Rotten XIII taldeek bata bestearen atzetik jo dute plazan, eta guztiek bota dituzte presoekiko elkartasun mezuak; bolondresek egindako lana azpimarratu dute, eta Sare herritarrak lortutakoa eskertu. Publikoak berotasunez erantzun du. Kanpoko karpan ere ez da musika falta izan: haurrentzat zein helduentzat Porrotx eta lagunak izan dira, baita Ttek elektrotxaranga, Trikidantz, Andoni Oilokiegi, Sua eta Dupla ere.

Sarek igandean sare sozialetan azaldu du urriaren 8ko eguna ederra izan dela, baina ohartarazi dute Ilunbeko jaialdian hainbat erasoren berri izan dutela erasoen aurkako arreta telefonoan. “Sare, Euskal Herriko Bilgune Feminista eta Emagin Elkartea elkarlanean aritu ginen bart, eta gaur, atzo jasandako eraso horiek salatu nahi ditugu. Ez dugu inolako erasorik onartuko (irainak, ukipenak, mehatxuak…)”. Erasoak gaitzetsi eta borroka feministarako aldarria ere zabaldu dute.