Saldiasen faltan, coach-ak hankamotz

  • Azken mudantzan telebista bidean gelditu zitzaigunez, Bar Jose Miguelera jaitsi behar izan dut Bago!azen bigarren atala ikustera, hortzak izerditan, lehengo astean Gorka Bereziartuak idatzitako kronika leitu ondotik. Bazen garaia norbaitek kontuari bete-betean heltzeko, ze, Go!azen telesailak euskaltzale progreen kontsentsua eskuratu duen honetan, miopia nabarmena sumatzen zen orain eta hemen puskatzen ari den fenomeno zinez goitiarragoaren aurrean.

Kepa Matxain @kmatxain
2019ko martxoaren 07a
Xabier Saldias gabe, Bago!az-eko coach-en gabeziak agerian geratu dira bigarren saioan.

Talent show bat, ados, musika lehia bihurturik, konforme, izar jenialaren ideia sustatuz, akort, nahi duzuena, baina hemen petrolioa ez da etxeko atarian topatzen. Begirada pixka bat altxaz gero, bat segituan konturatzen da BaGo!az zorioneko istripu bat dela ETBren gainbeheran. Horixe azaldu nahi izan diot Karmen tabernariari mostoa eskatzearekin bat, jartzeko faborez ETB, ez zitzaiola damutuko, hastear zela ertz askotako artefaktu sailkaezina, sentimenduen mendi errusiarra, orain barre algara, orain malko parrasta, orain txalo sorta, orain une deserosoa, BECera joaten ez den euskaldun bataz bestekoak hamar urtean bizi dituen gorabehera emozional guztiak ordu eta erdian konprimatuta. Ba ote dago telebistari gehiago eskatzerik?

Ez dut haren begiratuan ulermenik sumatu, baina aldatu du katea gutxienez, une ezin aproposagoan aldatu ere. Andoni Ollokiegi Josu Gonzalezen eta Jokin Doralen arteko dueluari hasiera ematen ari zen, Latzenen Laztana-rekin ahots kordak tenkatuaz. Kantu aski exijentea izaki, tonalitate altuetan jokatu da partida. Jakina da Ollokiegi urretxindorraren pare moldatzen dela halakoetan, baina ikusteko zegoen beste biek ze maila emango zuten. Injustiziaz mintzo zen Bereziartua joan den astean, epaimahaikoek Josuren faltseteari dagokion merezimendua eman ez ziotelako. Osotoro babesten dut mozioa, eta are gehiago gaurko emanaldiaren ostean mutila kaleratu dutela ikusita. Berdin Karmenek ere. Aipatu didanez, Josuk eman duen maila gerora saio osoan coach ia guztiek emandakoaren gainetik egon baita.

Bi unetan nabaritu dugu hori. Batetik, Izaroren Er(h)ori kantuan. Alex Sarduik, Aintzane Arzamendiri laguntzen ari zela, Ormaiztegiko oilarrarenak eta bi bota ditu. Zer ez da atera eztarri horretatik. Josu Gonzalezen faltsetea gupida gabe kritikatzen zuena, zer eta faltsetearen faltan kukurrukuka. Bigarrenik, Huntzaren Zer izan abestian, Iker Villa indartsu sartu da eszenatokian –“Donostia, Baraka, hau da BaGo!az!” oihuka- eta asmo onez ekin dio gero bigarren ahotsa egiteari, baina bigarrenetik hirugarrenera bidean zihoan zerbait atera zaio, Gabriela Gandara lehiakidearen kalterako –marka da gero, amaieran nor eta bera puntuatu dute okerren, batere kulparik gabe–. Kontua saldu diodan bezala saldu ondoren, saioak aurrera egin ahala Karmenen zaputza gero eta nabarmenagoa zen. Azkenerako, garbi bota dit: “Hemen ez du edonork balio coach izateko”. Eta sekula baino gehiago sumatu dut Xabier Saldiasen ausentzia.

Hala azaldu nahi izan diot Karmeni: “Saldiasen faltan, gerri mugimenduek irabaziko dute agian, baina patxadak galtzen du, dotoreziak galtzen du, zer esanik ez emozioak. Saldiasen faltan, faltseteak galtzen du –edonor da gai faltsetean kantatzeko, baina faltsetea biribildu, hori Saldiasek bakarrik egiten du–. Eta, Saldiasen faltan, kanten hautaketak galtzen du. Bereziartuak lehengo astean Saldiasen hautaketa kritikatzen zuen, Akelarreren bat kantatu zuelako. Faborez, B aldeko errepertorioak ahanzturatik berreskuratzeko keinu txiki horiek aintzat hartu beharko ditugu, ala?”. Eta beste mosto bat eskatu diot, baina Karmen ez zegoen txorakerietarako. “Batzuek lotara joan behar diagu. Ez al daukak ezer hoberik egiteko edo ze kristo?”. “Saldiasekin denak irabaziko du, Karmen. Ikusiko duzu”.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Bago!az lehiaketa  |  Musika

Bago!az lehiaketa kanaletik interesatuko zaizu...
Madonna ulertuko duen coach baten bila

Arazoren bat dagoela susmatzeko motiboak eman dizkidate sofan eseri eta ETB1 jarri dudanean: “Aste honetan ere Bago!az? Joder, zoaz pikutara behingoz”. Gogorra da talent show honen jarraitzaileon bizitza, kasik beganoek baino jazarpen handiagoa pairatzen dugu; kasik haiek baino azalpen gehiago eman behar ditugu gure aukera telebisiboaz. Aski da.


Injustizia nabarmen bat, Bago!az lehiaketaren estreinaldian

Egunak neramatzan Bago!az talent showaren denboraldi berriaren iragarkiak ikusten ETB1en eta pentsatu nuen: “Hainbesteko txaranga ematen badiote, zerbait izango du ba programa horrek”. Asteazken gaueko konpetentzia ez zen beste mundukoa –bateko Conquis eta besteko enegarren Madril-Barça–, eta beraz, serioski planteatu nuen denboraldi honetara engantxatzea.


Azkenak
EGILEA
Eguneraketa berriak daude