Espainiako Epaitegi Gorenak eta Pablo Llarenak kolpe berria hartu dute Europan. Carles Puigdemont Junts per Catalunyako europarlamentariaren aurka aurkeztutako euroagindua indarrean zegoela defendatu du Italiako justiziaren aurrean Llarenak, baina Sassariko Heelgite Auzitegiak ez dio arrazoia eman.vEpaileak Puigdemonten aurkako euroagindua bertan behera uztea erabaki du, Europako Justizia Auzitegiak Pablo Llarenak berak aurkeztu zituen auzi aurrejudizialei buruz erabaki bitartean. Fiskalak tesi hori defendatu du epaiketan, eta presidente ohiaren defentsa ados azaldu da.

Puigdemontek igandean bidaiatu du Sardiniara astelehenean deklaratzeko. Epaitegi aurrean babesa azaldu dio kataluniako independentismoak. Bertan ziren Omnium Culturaleko edo ANCko ordezkariak, CUP, ERC eta JxCateko kideak eta Clara Ponsatí eta Toni Comín erbesteratuak, besteak beste. Kataluniako presidente ohiak ez du adierazpenik egin epaitegian sartu edo irtetean, baina astelehen arratsalderako prentsaurreko deialdia egin du.

Erreakzioak

Independentismoak poza agertu du Italiako justiziaren erabakiarengatik. Twitterren erreakzioak azkar zabaldu dira: "Carles Puigdemont presidentea askeagoa da gaur, eta justizia espainiarra gero eta isolatuagoa dago", idatzi du Laura Borras Kataluniako Parlamentuko presidentea; "Europako justiziak estatuaren errepresioaren aurka egiten du beste behin, baina jazarpen judiziala amnistia eta autodeterminazioarekin baino ez da geldituko", Pere Aragones Kataluniako Presidenteak; "Gaur arratsaldean Europako Parlamentuaren osoko bilkura modu telematikoan jarraitu ahal izango dut Alguerretik", Puigdemontek berak; “Errepresioaren aurkako konpromisoan berresten gara, hala nola independentziaren aldeko borrokan”, CUPek; "Eta jarraitzen dugu! Besarkada bat president. Bagara eta izango gara!", Omnium Culturaleko presidente Jordi Cuixartek.