ZAIN, Rio Aragón eta Yesa+No taldeek bultzatu dute ekimena. Esa inguruko 300 lagunek hartu dute parte bideoan, eta hiru hizkuntza entzun daitezke: euskara, aragoiera eta gaztelania.

“Zientzialariak bat datoz esatean gaur egungo epidemien zati handi bat, eta etorkizunean ager daitezkeenak, ingurumenaren degradazioarekin lotuta daudela", diote plazaratutako oharrean. “COVID-19ak uzten digun irudi nagusia sistema baten irudi dramatikoa da. Sistema horren oreka delikatua desegiten da salbuespenezko zerbait sortzen den unean”. Krisiaren kudeaketarekin kritiko agertu dira aipatu plataformak: "Agerian geratu da administrazioak ez duela lan egin pertsonen osasuna, segurtasuna eta ongizatea lehenesteko. Arazoa ez dako baliabide falta. Arazo nagusia da baliabideen zati handi bat ez dela gizarte osoaren osasun eta ongizatera bideratzen, gutxi batzuk aberastera baizik".

Norabide horretan kokatzen dute Esa urtegiaren handitze proiektua. "Obra publiko handi bat zalantzan jartzen den bakoitzean, azpiegitura horrek sortuko duen onura handiagoa dela argudiatzen da, eragiten dituen kalteak baino. Esaren kasuan, handitzearen ondoren sortuko diren hektarea ureztatuez hitz egiten digute, baina inoiz ez dute emango lur ureztagarri horiek dituzten jabeen daturik". Adierazi dute ekoizle txikiak kaltetuko dituela proiektuak, "latifundista handien mesedetan".

Bestalde, gogorarazi dute Esako urtegia handitzeko obrak ez direla gelditu. "Herritarrak eta haiekin gure biltzeko eta manifestatzeko eskubideak berrogeialdian jarraitzen zuten bitartean, osasuna, ongizatea eta segurtasunaren gainetik negozioak eta irabaziak jartzen dituztenek, ez diote obretan lan egiteari utzi". CHE konfederazioak aurkeztutako Plan Hidrologikoaren arabera, Esako obrak 2027. urtean amaituko dituzte.