2020ko uztailaren 12a
Espainiako Terrorismoaren Biktimen Babes eta Aitortzarako Legearen erreforma prestatzen ari da gobernua, Espainiako Gobernuaren EAEko ordezkari Jesús Lozak jakinarazi duenez. Erreformaren zirriborroak udalak zigortzea aurreikusten du.
Egun indarrean dagoen Terrorismoaren Biktimen Babes eta Aitortzarako Legea 2011koa da. Espainiako Gobernua lege horren erreforma prestatzen ari da. Helburuetako bat da ekiditea euskal preso politikoei harrera publikoak egitea, Espainiako Gobernuaren EAEko ordezkari Jesús Lozak EFE agentziari adierazitakoaren arabera. Hernanin eta Oñatin José Javier Zabaleta eta Xabier Ugarte preso ohiei eginiko harrerak aipatu ditu Lozak.
Barne Ministerioak lege erreformaren zirriborroa eskuetan du, El Correo egunkariaren arabera. Zirriborroak harrerak baimentzen dituzten edo horiek ekiditeko neurririk hartzen ez dituzten udalak zigortzea aurreikusiko luke.
Zirrikituen bila
Lozaren irudiko, harreretan “biktimak umiliatu” egiten dira eta “terrorismoari gorazarre” egiten zaio. Halere, Espainiako Estatuko jurisprudentziak eta Europako Giza Eskubideen Epaitegiaren sententziek horiek zigortzeko “ibilbide penal mugatua” uzten dutela adierazi du. “Zirrikituak” aurkitu daitezkeela uste du, ordea.
Urkulluren borondatea
“Diskrezioz” eta adostasunak bilatuz lan egitea defendatu du Lozak. Baikor azaldu da legea erreformatzeko akordioa lortzeko aukerez, eta bide horretan EAEko lehendakari Iñigo Urkulluren “jarreraz eta borondateaz inongo zalantzarik” ez duela adierazi du.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
